'Oroimena eta egia. Bizikidetzaren bidea' hitzaldi zikloa antolatu du udalak
Udalak etorkizuneko bizikidetzaren oinarriak ezarri nahi dute, gertatutakoa ez errepikatzeko. Hitzaldi ziklo batekin hasiko dira.
EH Bilduko Jexux Leonet eta Eneritz Arbelitz, erdian, EAJko Janire Mitxelena eta Iñaki Arbelaitzek lagunduta. 2020ko azaroan, Oiartzungo Udalak —taldeen kontsentsuarekin— eta Arantzadik hitzarmena sinatu zuten. Etorkizuna bizikidetzan oinarritzeko eta gertatutakoa berriro ez errepikatzeko oinarri sendoak jartzea da helburua, eta hitzaldi zikloa antolatu dute. Oroimena eta egia. Bizikidetzaren bidea izena jarri diote.
Aranzadi elkartea 1936tik gaur egun arte egondako giza eskubideen urraketak ikertzen ari da. “Ezinbestekoa da oroimena eta egiak duten garrantziaz jabetzea eta horretarako herritarrentzako hitzaldi zikloa antolatu dugu”, adierazi du udalak.
Lehenengo hitzaldia datorren asteazkenean izango da —hilak 17—. Bertha Gaztelumendi Caballerok eta Irantzu Mendia Azkuek hitzaldia emango dute, Genero ikuspegia egia berreskuratzeko mekanismoetan: Latinoamerika, Afrika eta Euskal Herria izenburupean.
Gaztelumendi kazetaria, errealizadorea eta Giza Eskubideen eta Botere Publikoen UPV/EHUko UNESCO Katedran ikertzailea da. Mendia, berriz, Garapenari buruzko ikasketetan doktorea da eta EHUko Soziologia eta Gizarte Langintza Saileko irakaslea.
Zikloaren kartela.
Hilaren 30ean (asteartea), Egia berreskuratzeko eskubidearen bilakaera eta erronkak hitzaldia izango da. Bertan Jon Mirena Landa Gorostizak eta Carlos Martin Beristainek hartuko dute parte. Lehena Giza Eskubideen eta Botere Publikoen EHUko UNESCO Katedrako zuzendaria da, eta bigarrena Hego Amerikako gatazketan akonpainamenduan aritu da.
Bi ekitaldiak 18:30ean hasiko dira, Aitziber Blancok gidatuta. Parte hartzeko, 943 49 18 62 telefonora deitu beharko da, edo e-mail bidez idatzi. Udalak bere Youtubeko kanalean zuzenean emitituko du.
