'Itsasoko biztanleak' izenpean argazki lehiaketa jarri dute abian
Blas de Lezo Pasaiako Itsas Arrantza BHIk itsasoan bizikide diren izaki nahiz objektuak ardatz izango dituen sorkuntza lehia abiarazi du. Bi sari daude.
Blas de Lezo Pasaiako Itsas Arrantza BHIk itsasoarekin lotutako argazki lehiaketa jarri du martxan. 
Aurten ere, Blas de Lezo Pasaiako Itsas Arrantza BHIk argazki lehiaketa antolatu du, aurreko edizioetan izandako arrakastak bultzatuta. Aurtengo gaia Itsasoko biztanleak izango dira, eta hala azaldu dute hautua: “Gai zabala eta ikuspegi askotatik interpretatzeko modukoa, eta horrexegatik, oso erakargarria”.
Itsasoan espezie desberdinak bizi dira, flora eta fauna anitz, baina baita mota guztietako objektuak ere: alturako arrantza-ontziak, merkataritza-ontziak, luzera txikiko arrantza-ontziak… eta horiek guztiak dira, antolatzaileen ustetan, nolabait, itsasoko biztanle. “Ikuspegi zabal horretatik, itsasoan bizi dela uste dugun guztiaren argazkiak atera ditzakegu”, azaldu dute.
Informazio gehiago jaso nahi duenak eskolako webgunera jo dezake. Argazkiak bidaltzeko posta elektronikoa erabili beharko da, eta horiek jasotzeko epea apirilaren 23an amaituko da, parte hartzaile bakoitzak gehienez ere lau argazki bidali ahal izango dituelarik.
Maiatzaren 15ean honako sari hauek banatuko dituzte parte hartzaileen artean:
- Lehenengo saria. Argazkiaren erakusketa iraunkorra ikastetxean eta FNAC-en gastatzeko 100 euroko txartela.
- Bigarren saria. Argazkiaren erakusketa iraunkorra ikastetxean eta FNAC-en gastatzeko 50 euroko txartela.
