Sei urteko espetxe zigorra Errenteriako gizon bat bahitu zutenei
Sei urte eta erdiko espetxe zigorra Errenteriako gizon bat bahitu zuten lau laguni.
Bahitzaileak atxilotzeko uneko irudia. Argazkia: Espainiako Barne Ministerioa Sei urte eta erdiko espetxe zigorra ezarri die Gipuzkoako Auzitegiko epaile batek, 2017ko abenduan Errenteriako gizon bat bahitu, tratu txarrak eman eta hiltzearekin mehatxatu zuten lau lagunei. Hamasei urteko zigorra eskatu zuen fiskaltzak, baina bahiketa onartuta, murriztu egin du zigor eskaera.
Ertzaintzak eta Guardia Zibilak elkarlanean egindako operazioan askatu zuten bahitutako gizona Tarragonan. Segurtasun Sailaren arabera, Frantziako talde arriskutsu batek bahitu zuen gizona Beraun auzoan 2017ko abenduaren 9an.
Ertzaintzaren iturriek azaldutakoaren arabera, etxetik noiz irtengo zain zeuden lau gizon hurbildu zitzaizkion biktimari kalean, bere etxe inguruan. Gogor kolpatu zuten, eta pistolaz auto batean sartu ondoren. Biktimaren anaiak Errenteriako Ertzain Etxean salaketa jarri zuen hurrengo eguneko goizaldean: “Salatzaileak adierazi zuen bahitzaileak, Malagan bizi den beste anaia batekin jarri zirela harremanetan telefonoz, eta hura askatzeko miloi erdi euroko erreskatea eskatu ziotela, hiltzeko mehatxua eginez”. Bahitu eta bi egunera askatu zuten gizoona eta bi bahitzaile atxilotu L´arboc del Penedeseko (Tarragona, Herrialde Katalanak) gasolindegi batean. Aurretik zihoan autoa ere atzeman zuen poliziak La Jonquerako mugatik (Girona, Herrialde Katalanak) hiru kilometrora, eta autoan zihoazen bi bidaiariak atxilotu. Azken auto horretan, pistola elektriko edo taser bat, eta gertatutakoarekin zerikusia zuen hainbat material atzeman zuten beti ere polizia iturrien arabera.
Bahitutako gizona osasun zentrora eraman behar izan zuten, bahitzeko unean jasotako kolpeak sendatzera, eta askatu eta hiru egunera elkartu zen familiarekin Oiartzungo Ertzaintzaren lurraldeko egoitzan. Atxilotutako guztiak, berriz, 27 eta 40 urte artekoak dira eta atxilotu zituzten guardia epaitegien esku utzi ondoren, espetxeratuta daude guztiak. Polizia operazioa ez zen hor amaitu, bahitzaileak eta bahitua bere etxean gorde zituen pertsona ere atxilotu zuten.
