Bizikidetzari buruzko lehenengo hitzaldia gaur izango da
Irantzu Mendiak eta Bertha Gaztelumendik hitzaldia emango dute gaur arratsaldean, gatazken ondorioei genero ikuspegi batetik begiratzeko.
Irantzu Mendia izango da hitzaldia emango duenetako bat. Oiartzungo Udalak elkarbizitzarako bidea egiteko bidea hasi du. Aranzadi elkartearekin sinatu zuen hitzarmena pasa den azaroan, 1936tik gaur egun arte egon diren giza eskubideen urraketak ikertzeko.
Elkarbizitzaren aldeko iniziatiba hori sozializatzeko asmoz, hitzaldi zikloa antolatu du udalak, Oroimena eta egia. Bizikidetzaren bidea izenburupean. Gaur bertan izango da lehenengoa, Irantzu Mendia eta Bertha Gaztelumendirekin. 18:30ean hasiko da, udaletxeko pleno aretoan.
Genero ikuspegia egia berreskuratzeko mekanismoetan: Latinoamerika, Afrika eta Euskal Herria hitzaldia emango dute, Aitziber Blancok gidatutako solasaldian.
Gaztelumendi kazetaria, errealizadorea eta Giza Eskubideen eta Botere Publikoen UPV/EHUko UNESCO Katedran ikertzailea da. Mendia, berriz, Garapenari buruzko ikasketetan doktorea da eta EHUko Soziologia eta Gizarte Langintza Saileko irakaslea.
Izena emateko aukerarik izan ez dutenek Oiartzungo Udalaren Youtubeko kanaletik jarraitu ahal izango dute, zuzenean.
Bigarren hitzaldia, hilaren 30ean
Zikloko bigarren hitzaldia hilaren 30ean (asteartearekin) izango da. Egia berreskuratzeko eskubidearen bilakaera eta erronkak izena izango du hitzaldiak.
Bertan Jon Mirena Landa Gorostizak eta Carlos Martin Beristainek hartuko dute parte. Lehena Giza Eskubideen eta Botere Publikoen EHUko UNESCO Katedrako zuzendaria da, eta bigarrena Hego Amerikako gatazketan akonpainamenduan aritu da.
Hitzaldi hori ere 18:30ean hasiko da, eta Youtubeko kanaletik jarraitu ahal izango da.
