Oiarperen asteburuko partiden kartelera (2021-03-18)
Eskuz binakako kadeteen lehen mailako finala jokatuko dute Zabaleta eta Landak, igandean, Azpeitiko Izarraitz pilotalekuan.
Oiarpeko kirolariek hamabost partida jokatuko dituzte asteburu luze honetan. Pilotari gehienek herritik atera beharko dute lehiatzera, Madalensoron hiru partida besterik ez baitituzte jokatuko.
Norgehiagoka nabarmenena Zabaleta eta Landa kadeteek jokatuko dutena izango da. Igande goizean, 11:00etan hasita, beren kategoriako lehen mailako eskuz binakako finala jokatuko dute.
Azpeitiko Izarraitz pilotalekuan izango da. Arerioak etxeko pilota elkartekoak —Ilunpekoak— izango dira, Odriozola eta Egiguren.
Beste partida aipagarri bat Iñarrak Iruran larunbatean jokatuko duena izango da. Eskuz banakako bigarren mailako trinkete txapelketan ari da —senior mailakoan— eta final laurdenei dagokion partida jokatuko du. Bere arerioa Aldunberri urnietarra izango da.
Gainontzeko partidak lehen faseetakoak izango dira, lagunarteko bat kenduta.
