Altzate denontzako parkea izatea aldarrikatu dute
Basoen Nazioarteko Eguna ospatu zen atzo, eta horren bezperan, Lezo eta Orereta batzen diren Altzate eremuan ekitaldi erreibindikatiboa egin zuten hainbat herritarrek.
Altzaten parkea egiteko aldarrikatu dute. Argazkia: Altzate Bizirik Plataforma Basoen Nazioarteko Eguna ospatu zen atzo, eta horren bezperan, Lezo eta Orereta batzen diren Altzate eremuan ekitaldi erreibindikatiboa egin zuten hainbat herritarrek. Gurekin Auzo elkarteko kideek erakusketa jarri zuten Iztieta Pasealekuan, eta bitartean dozenaka lagun padura izandako eremuan sartu ziren lanabesak lagunduta aldarrikatzen duten parkea gauzatzera. Aitzurrak eskutan, ehundik gora zuhaitz landare aldatu zituzten etxebizitzak eraikitzea aurreikusita dagoen eremu horretan. Haltza izenetik dator Altzate antolatzaileek azaldu dutenez, eta batez ere, eremuari izena eman dioten haltzak aldatu zituzten pasa den larunbateko ekitaldi horretan, baina baita lizarrak eta urkiak ere.
Orubea inguratzen duten hormetan eta publizitate panelean ere, espekulazioaren kontrako eta parkearen aldekoak idatzi zituzten bildutakoek.
Hirigintza negozioa, gizarte osoari egiten zaion iruzurra dela esan dute ekitaldiaren antolatzaileek, “hormigoia baino gehiago, arnasa hartzeko eremu berdeak behar dira, batez ere Oreretako hiriguneak eta Iztieta-Ondartxo auzoek dituzten gabeziak kontuan izanik”. Gobernatzen duten alderdiei ere helarazi zieten mezua larunbateko ekitaldiaren barruan: “Aski da, emergentzia klimatikoa deklaratu eta gero geratzen diren inguru libre apurrak berreskuratu beharrean, beraiek artifizializatzen jarraitzeaz. Honek adierazten du zein faltsua den zuen diskurtsoa”.
Eremua parke bihurtzea eskatzearekin batera, Lobato Etxearen aldeko aldarria ere egin zuten bildutakoek: “Oarsoaldeko ondarea da Lobato Etxea eta bertan bizi edo bere aktibitatea aurrera eramaten duten pertsonei elkartasuna adieraztearekin batera, bertan jarraitzeko babes osoa eskaini diete”.
