Batelen podiumak pasaitar kutsua hartu du asteburuan
San Juan, San Pedro eta Illunbeko batelek onena eman dute ligako lehen jardunaldietan, Trintxerpen eta Donostian izandako estropadetan.
Larunbatean Trintxerpen egindako estropadako irudia. Argazkia: San Juan Koxtape. 
Batelek Pasaia eta Donostiako urak hartu zituzten larunbat eta igandean, 2021eko Gipuzkoako Batelen Ligaren barneko lehen arraunkadak emanez. Pasaiako arraunlarien nagusitasuna orokorra izan zen maila guztietan, podiumak arrosa eta morez zipriztinduta utziz asteburuko estropadekin.
Bi egunetako jardunaldiek eguzkia izan zuten lagun, eta nahiz eta zaleei ez bertaratzeko eskatu, jarraitzaile sutsuenek ezin izan zioten grinari aurka egin eta ertzetik eman zizkieten indarrak arraunlariei. Udaltzaingoak segurtasun neurriak kontrolatu zituen eta giro ederrean lehiatu ziren 65 ontziak.
Hona hemen, gaur-gaurkoz, sailkapena, gurera ekarrita:
- Neska Haurrak. San Juanek du buruzagitza; larunbateko estropadan lehenak izan ziren, eta igandekoan postu bat galdu bazuten ere, bigarrenei -Zumaia B- puntu bateko abantaila atera diete sailkapen orokorrean.
- Mutil Haurrak. San Pedroko B eta A taldeak bigarren eta hirugarren doaz, hurrenez hurren. Lehena Orio da.
- Promesak (neskak). San Juan A da lehena 22 punturekin, eta San Juan B bigarren, 20 punturekin. Biek puntuazio berdina lortu zuten asteburuko estropada bakoitzean.
- Mutil Kadeteak. San Juan bigarrena da, Oriotik bi puntura. Sanpedrotarrak sailkapeneko zazpigarren postuan daude -bederatzi dira kategoria honetan-.
- Neska Gazteak. San Juan podiumeko hirugarren postuan dago, Orio eta Hibaikaren atzetik.
- Absolutuak (neskak). San Juan A-k du buruzagitza eta B taldeak laugarren postua.
- Mutil Gazteak. San Juan A eta B laugarren eta seigarren postuetan daude, hurrenez hurren. Illunbe dago azken horien atzean, puntu bateko diferentziarekin. San Juan C eta San Pedrok azken-aurreneko eta azken postuak dituzte, orden horretan.
- Gizonezko Seniorrak. San Juan bigarren donostiarren atzetik eta San Pedro laugarren. Bi puntuko diferentzia elkarren artean.
Sailkapen orokorra honako esteka honen bitartez kontsulta daiteke.
