Portuko "jarduera desegokiak" bazter daitezela eskatu du Lezoko Badian Bizik
Mozioa aurkeztu du osteguneko udalbatzarrean azter dadin. "Urte asko dira, gehiegi, herritarrak portuak eragiten dituen kalteak pairatzen ari direla".
Hamarnaka lagun elkartu dira epaitegiaren aurrean. Lezoko Badian Bizi taldeak portuko “jarduera desegokiei” bukaera eman dakien eskatzeko mozioa aurkeztu du Lezoko Udalean. Osteguneko udalbatzarrean dira aztertzekoak mozioa herriko hamahiru zinegotziak. Taldekideen ustez, urte asko dira, “gehiegi gure ustez”, herritarrak “portuak eragiten dituen kalteak” jasaten ari direla. Mozioaren testuan, lau puntutan, Lezoko Badian Biziren eskaera zehatzak daude (behean daude, hitzez hitz), hautetsiek azter eta onar ditzaten.
Taldekideek portuak eragiten dituen kalteak zerrendatu dituzte: “Kutsadura akustiko neurrigabea, atmosferikoa, luminikoa, kea darion txatarra metatua, badiako uren kutsadura, trafiko astun arriskutsua, material oso kutsakorren zamaketa eta garraioa herriko errepideetan barrena…”.
Hala, herritarrek portuko jardueraren inguruko kexak jarri dituztela jakinarazi dute taldekideek, eta horren araberako espedienteak zabaldu direla: “Baina batek berak ere ez du herritarren bizi kalitatea hain larri kaltetzen duten jarduerak zuzentzerik edo eteterik lortu”. Horregatik, lezoarrak portuaren edo Algeposaren aurrean “babesgabe” gertatzen direla adierazi dute. Gainera, Portu Agintaritzak eta bertako enpresa askok euren araudiek eta legeek diotena betetzen ez dutela adierazi dute, “eta ez dago haien aurka egiteko modurik, jarduera lizentziarik gabe, hau da, baimenik gabe ari direlako gehienak”.
Lezoko Badian Bizik zehaztu du ez daudela portuaren jarduera ekonomikoaren aurka. Baina legeek diotena bete dadila eskatzen dutela nabarmendu dute.
Honakoak dira, hitzez hitz, mozioan jasotako lau puntuak:
- Udalak Lezoko portuko eremuan diharduten enpresei jarduera lizentzia eskatzea eta gai horri behar bezalako jarraipena egitea.
- Portuko eremuan diharduten enpresa guztiei Osasunaren Mundu Erakundeak gomendatzen dituen eta egun indarrean dauden lege eta araudiak zorrotz bete ditzaten exijitzea.
- Aurreko eskakizun horiek bete arte zain egon gabe, premia handiz eta berehala zuzentzeko modukoak diren jarduera desegokiak zuzen ditzaten eskatzea portuan diharduten enpresei. Hala nola: zamaketa ordutegiak errespetatzea, zarata mugak errespetatzea, garabi dieselak berriz elektrikoez ordezkatzea eta itsasontzien argindar beharrak hartune elektrikoak ezarriz asetzea, euren motorrak itzaliz.
- Azkenik, Lezoko Udalari zera eskatzen diogu: portuko jarduera desegokia arazo bat dela onar dezala, eta arazo horri irtenbidea emateko, goragoko erakundeetara jo dezala ahalik eta azkarren. Udala herritarrei zor zaie.
