Pasaia apirilaren 3an Sevillan egongo da, Realarekin
Realak abiatutako 'Gurekin' kanpainaren barne, Gipuzkoako udalerrietako bandera bana jaso eta eman du klubak. Pasaian elkar trukea egin dute dagoeneko.
Atzo goizean izan zen Realeko autobusa Pasaian, bandera trukatze ekitaldian. 
Apirilaren 3an Sevillan izango den finala ezingo dute zaleek zuri-urdinez apaindu aurten, azken finala izan zenetik 30 urte baino gehiago joan diren honetan. Klubak realzaleak estadiora eraman nahi izan ditu, eta horretarako Gipuzkoako herrietan barrena Gurekin bira jarri du abian, udalerri bakoitzeko bandera jaso eta taldearen beste bat uzteko asmoz; hala, gipuzkoarrak andaluziar hiriburuan egongo dira, eta Reala Gipuzkoan.
Pasaiako Udalak elkar trukea egin du jadanik: armarria jokalarientzat, eta Realeko bandera pasaitarrentzat. Bandera trukatze ekitaldia udaletxearen aurrean egin zuten atzo, eta Izaskun Gomez alkatea izan zen ekintzaren gidari. Herriz herriko bisitak atzo -astelehena- hasi zituzten, eta ostiralera arte egingo dituzte, azken ikurra Donostian jasoaz.
