San Pedroko pintadak "ankerkeria pertsonal eta publikoa" direla uste dute
PSE-EE, EAJ eta Podemosek barrutian agertutako pankartak "erabat gaitzesgarriak" direla salatu dute. Otermin alkateordeari elkartasun keinua egin diote.
Azken asteotan San Pedron agertutako pankartetako bat. Udaleko langileek kendu dituzte. 
Azken asteotan San Pedron agertutako pankarten gaineko adierazpen bateratua egin dute Pasaiako udalbatza osatzen duten lau alderditik hiruk: PSE-EE, EAJ eta Ahal Dugu Podemos-ek, hain zuzen ere. Gailendu dute aldarri horiek udalaren aurkako ez ezik, barruti hartako alkateorde eta Hirigintza zinegotzi den Nahikari Oterminen kontrako eraso zuzena direla.
Zinegotziari elkartasuna adieraztearekin batera, hiru udal taldeek azken egunetako ekintzak “erabat gaitzesgarriak” direla salatu dute, “ezin baita onartu udalkide baten aurkako ankerkeria pertsonal eta publikorik”.
Alderdiek adierazi dute inolaz ere ez dutela onartuko halako adierazpenik egin dadin herri gobernuari “kritika egiteko aitzakiarekin”. Horiek horrela, bizilagunei zuzeneko aipamena eginez amaitu nahi izan dute manifestua: “Horrelako jarduerek ez dute batere laguntzen pasaitar guztien bizikidetza baketsua sustatzen”.
