Euskara sustatzeko 72.000 euro bideratzea onartu du plenoak
Gai guztiak aho batez onartu zituzten. Orio Txoko Txiki higiezin agentziarekin zegoen auzia bukatu dela jakinarazi zuten, udalaren alde.
Atzoko plenoko irudia. Atzo arratsean egin zuten martxoari dagokion plenoa. Bozketa behar izan zuten puntu guztiak aho batez onartu zituzten EH Bilduren eta EAJren talde politikoek.
Jakinarazpen bat izan zen plenoko lehen puntu potoloena. Udalak eta Orio Txoko Txiki higiezin agentziak zuten auzia bukatu da. Orio Txoko Txikiren jabetzako eremu baten desjabetzeak eragin zuen auzibidea. Udalak landa lur gisa baloratu eta zegokion prezioan ordaindu zuen. Enpresak, berriz, lur urbanizagarri gisa baloratu eta ordaintzea nahi zuen.
Epaitegiek Oiartzungo Udalari eman diote arrazoia, eta sententzia eta errekurtsoen bidea egin du gaiak. Auzitegiak, oraingoan, ez du onartu enpresak jarritako kasazio errekurtsoa, eta auziaren bidea bukatu da.
Jexux Leonet alkateak zorionak eman zizkien udalaren zerbitzu juridikoei. “Prozesu luzea eta presio handikoa izan da hau. Lan txukuna egin da eta horregatik, sententzia Udalaren aldekoa izan da”, esan zuen Leonetek.
Diru laguntzak eta hitzarmena
Xorrola herri barruko autobus zerbitzua Gipuzkoako garraio publikoaren tarifa bakarrean egon dadin Gipuzkoako Garraio Agintaritzarekin hitzarmen berria onartu zuten beste puntu batean.
Horrez gain, Oiartzungo Udalak 72.000 euro bideratuko ditu euskara sustatzen duten jardueretarako. Horietako bat da Hitz Hots elkartea, Oiartzun Irratia kudeatzen duena. 54.700 euro jasoko ditu.
Migratzaileei laguntza
Eskari galderetan, EAJk migratzaileei buruzko eskaera egin zuen. Zehazki, haiek laguntzeko Oiartzunen jar daitezkeen baliabideak aztertzea eskatu zuen Janire Mitxelena zinegotzi jeltzaleak.
Migratzaileei ematen zaien laguntza Eusko Jaurlaritzak eta Gurutze Gorriak kudeatzen dituztela onartu zuen Mitxelenak, eta oraindik ez direla jarri gaineratu zuen. “Gaiari heltzea nahi dugu, harremanetan jarriko balira”, esan zuen.
Leonetek erantzun zion udala prest dagoela gaia lantzeko. “Duela bi urte Eusko Jaurlaritza udalarekin harremanetan jarri zen, migratzaileei laguntzeko baliabideen inguruan galdetuz. Udalak egin zuen bere ekarpena”, zehaztu zuen alkateak.
EH Bilduko zein EAJko ordezkariek nabarmendu zuten Oiartzun herri “solidarioa” dela.
