Irisgarritasun bertikalean, urrats bat gehiago
Igogailu berri baten proiektua martxan du udalak. Gaur eman du horren berri, eta zehazki, Beraun auzoan kokatuko du, Mauricio Ravel, Aita Donostia, eta Juan Crisostomo Arriaga kaleak lotuko ditu, eremua irisgarriagoa egiteko herritarrentzat.
Aita Donosti, Mauricio Ravel eta Juan Crisostomo Arriaga kaleak lotuko dituen igogailu proiektua aurkeztu du udalak. Argazkia: Errenteriako Udala Igogailu berri baten proiektua martxan du udalak. Gaur eman du horren berri, eta zehazki, Beraun auzoan kokatuko du, Mauricio Ravel, Aita Donostia, eta Juan Crisostomo Arriaga kaleak lotuko ditu, eremua irisgarriagoa egiteko herritarrentzat. 2019-2023 agintaldi planaren barruan jasota dago eremu horren birgaitzea, eta udal teknikariek eremua aztertuta, hiri igogailua jartzea dela irisgarritasun arazo nagusia ezabatzeko konponbide teknikoa ondorioztatu dute.
Hiri igogailu horren proiekturako inbertsioa ez dela inolaz ere azken urteetan eraikitakoen parekoa izango zehaztu du udalak, “ibilbidea laburragoa da, eta zailtasun gutxiagoko igogailua izango baita”. Inbertsioa 450.000 eurokoa izango da, eta Eusko Jaurlaritzak 266.66 euroko laguntza jaso du. Aurten kontratatuko dute exekuzio proiektua eta datorren urtean eraikiko dela aurreikusi dute. Proiektua garrantzitsua da auzoarentzat udalaren esanetan, “jende asko ibiltzen da eremu horretan, eta igogailuak bizilagun askori erraztuko dio ikastetxerako eta merkataritza eremu garrantzitsu baterako ibilbidea”.
Irisgarritasunaren garrantziaz jakitun da udala, “herritarren irisgarritasuna erraztearekin batera, hiri igogailuen bidez, ibilgailu partikularren erabilera gutxitzen baitu”.
Gaur aurkeztutakoaz gain, datozen urteetan aurreikusi dute beste igogailu bat jartzean, azken hori, Gaztañon. Une honetan hamahiru igogailuk ematen dute zerbitzua udalerrian.
