"Kirats kalea" izendatu du Papresa aurrekoa Eguzkik, eragiten duen askotariko kutsadura salatzeko
Kiratsa, zarata, airearen kalitatean eragina... askotarikoa da Papresa lantegiak sortzen duen kutsadura, eta ez gutxiago, batez ere inguruan bizi diren bizilagunei eragiten dizkien ondorio kaltegarriak Eguzkik salatu duenez.
Kirats kalea txartela jarri du Eguzkik Papresa lantegiaren parean. Kiratsa, zarata, airearen kalitatean eragina… askotarikoa da Papresa lantegiak sortzen duen kutsadura, eta ez gutxiago, batez ere inguruan bizi diren bizilagunei eragiten dizkien ondorio kaltegarriak Eguzkik salatu duenez. Ez da lehen aldia, eta badirudi azkena ere ez dela izango Eguzki Talde Ekologistak neurriak hartu eta egoera hori ezabatzeko eskatu duena. Kezkatuta azaldu da talde ekologista, Papresaren jarduerak eragin etengabea duelako askotariko arlotan eta eremutan, pertsonen osasunean, eta biztanleen bizi kalitatean, “batez ere hurbilen daudenengan. Kutsadura akustikoa, zikinkeria, trafikoan, usainean eragindakoen gaineko kexak etengabeak dira”.
Horiek salatuta, haserre azaldu da; ez duela ikusten, egoera nabarmena bada ere, inpaktu horiek arintzeko neurririk hartzen denik jarri du mahai gainean. Gaia serioa dela nabarmendu du, usaimenari ez ezik, “usain sarkorra askotan jasan ezina da”, osasun publikoari ere eragiten diola salatu baitu: “Lohi zisternetan erreakzio kimiko batzuk sortzen dira, eta egiaztatu daitekeenez, egungo zuhaitz hesia erretzera hel daitezke; are okerragoa dena, oso maiz erabiltzen den oinezkoen bidetik bereizteko metalezko baesa jatera ere”.
Bide horretatik bada, Eguzkiren kezka, izan ere elementu horien gainean halako eragina badu, pertsonengan okerragoa den zalantzarik ez du.
Salaketak, udalak gaiari serio heltzeko balio dezala espero duela dio Eguzkik —2012ko uztailean salatu zuten— eta bere eskumenak baliatuta luzamendurik gabe neurriak har ditzan eskatu diote arazoa desagerrarazi eta bizilagunen bizi eta osasun baldintza egokiak bermatzeko.
Momentuz, Kirats Kalea izena duen kale izendegi txartela kokatu dute lantegiaren parean.
