Kolore eta usain eztanda bihar Zumardian
Errenteriako XII. Lore eta Landare azoka egingo dute bihar Zumardian goizetik eguerdira arte.
Lore eta Landare Azoka. Errenteriako XII Lore eta Landare Azoka egingo dute bihar Gamon Zumardian. Gipuzkoako ekoizle nagusienak izango dira bertan, tartean, DEkolore osatzen duten ekoizleetako hamabi. Azokaren ordutegia 09:00etatik 14:00etara izango da, eta lore eta landare postuez gain, kosmetika naturala, sendabelarrak, hazi eta lore lehorrekin egindako artisau lanak eta hazi zein landare ekologikodun postuak ikusteko aukera izango da.
Horrekin batera, txikienei begirako txokoa antolatuko dute 11:00etatik 13:00etara: landaketa, lore lehorrekin eskulanak egiteko tailerra izango dituzte.
2002an hasi zen Behemendi elkartea baserritarren produktuen azoka bereziak egiten, eta Errenteriako Udalarekin elkarlanean 2004an. Azoka antolatzeko arrazoia, egun baserritarren produktuen feriek bizi duten beherakada da; horri, erosleen ohitura aldaketa gehitu behar zaio. Azoka berezi horiek baserritar profesionalentzat bere ekoizpena saltzeko bide ezin hobea izan dira beti, salmenat puntua izateaz gain, baserriko produktuen promozio eta erakusketa gune ere badirelako.
