[Galeria] Intxaurrondoa, bihotzean irri bat utzi dutenen omenez
Abaraxka ludotekak antolatuta, Pirritx, Porrotx eta Marimotots pailazoek utzitako intxaurrondoa landatzeko geratu dira Ibargainen.
Urtarrila iristen den aldiro, Pirritx, Porrotx eta Marimotots pailazoek emanaldia eskaintzen dute Elorsoro kiroldegian. Aurten enkargua utzi diete oiartzuarrei, intxaurrondo ernamuin formarekin. Hildakoak gogoratzeko sinboloa izatea nahi zuten.
Abaraxka ludotekak hartu zuen zuhaixka landatzeko ardura. Komunitateko haurrekin gaia landu ondoren, bozketa bidez erabaki zuten Ibargain parkean landatzea.
Gaur goizean elkartu dira. Ludotekara joaten diren haurrek egin dituzte aurkezpen lanak, eta haiek eman dute iniziatibaren berri.
Jarraian, Lur Kortak doluarekin ardatz duen ipuin bat kontatu dien han bildu diren hamarnaka lagunei. Luken Larburu soinujoleak Agur jaunak hunkigarria jo du haurrek intxaurrondoa landatzen zuten bitartean.
Zuhaixkaren esanahia azaltzen duen egurrezko plaka bat azaleratu du ludotekako haur batek, politikariek egiten duten protokolo ponposorik gabe.
Ondoren, Esteban Martiarenarek idatzitako Intxaurrondo, intxaurrondo, ez zera bakarrik egongo bertsoak kantatu dituzte denek batera (behean irakur daiteke bertsoa).
Ekitaldia bukatzeko, ludotekako Nekane Martiarenak iragarri du asmoa dutela noizean behin intxaurrondoa dagoen tokira joango direla, hil direnak gogoraraztera. Joan direnak ez baitira inoiz hilko oroimenean jarraitzen duten bitartean.
Bertsoa (Doinua: Galtzaundi)
Atsekabean lagun
zorionean lagun
maite duguna joan da
ze miña daukagun
ezingo dugu ahaztu
ez iñoiz ez iñun
heriotza bizitzan
errotu dezagun.
Nahiz ta bere gorputza
geratu atzean
gurekin egongo da
intxaur bakoitzean
irri egingo dugu
bera oroitzean
irri bat utzi baitu
gure bihotzean.
