Urte batzuk etenda egon ostean, jardunari berrekin diote udalerriko gabeziak ikusarazteko kanpaina batekin, 'Non dago Pasaia?' lelopean.
Sortu Pasaiak 'Non dago Pasaia?' lelopean kanpaina abiarazi du. Irudian, Antxoko kioskoa. 
Urte batzuetan etenda egon ondoren, Sortu Pasaiak jardunari berrekin dio aste honetan Non dago Pasaia? lelopean abiatutako kanpaina batekin: “Gabezia eta erronkak islatu eta aspalditik lurpean ezkutatu nahi izan duten herri honen izaera borrokalaria azaleratzera gatoz”.
Ezkerreko mugimenduak “gogoetarako tartetxo bat ireki” asmo du, Sortu Pasaia bihurtuz borrokari segida emateko tresna politikoa. Taldeak lehen agurra egin du ezkerreko abertzaletasunaren 60 urteko borroka esperientzia barnebiltzen duen mugimendu gisa, “Euskal Herriaren askapen nazionala eta soziala bultzatzen laguntzeko prest”.
Etorkizuna pasaitarrekin elkarlanean eraikitzeko parte hartzeari bide eman eta proiektu kolektiboak eratuko dituztela azaldu dute, honako eustazpi hauetatik abiatuz: errotiko aldaketa politiko eta soziala, independentzia, sozialismoa eta feminismorako bidea jorratzen hastea.
Kanpaina
Herriak aldaketak behar dituela sinestun, taldeak lehen dinamika abiarazi du Non dago Pasaia? lelopean. Horren baitako ekintza sortak udalerriaren gabezia eta erronkak agerian jarri nahi ditu, “eta aspalditik lurpean ezkutatu nahi izan duten herri honen izaera borrokalari eta komunitarioa azaleratu”.
Oraingoz sare sozialen bidez nahiz Pasaiako kaleetan hainbat aldarrikapen eta kritika zabaldu dituzte, besteak beste honako gai hauei helduz:
- Lanerako ezintasuna. Herritarren gehiengoak udalerritik kanpo egiten du lan.
- Zaintza. Pasaia zaharkitutako herria dela gogora ekarri dute, herritarren %23ak 65 urtetik gora baititu. 1.000 biztanleko 9 plaza daude eguneko zentroetan, eta 14 zaharren egoitzetan.
- Etxebizitza. Pasaitarrak “pilaturik” bizi direla salatu dute, biztanle dentsitatea altua baita eta Donostialdeko gentrifikazio prozesuak belaunaldi berriak udalerrira ekartzen dituelako. Gainera, etxebizitzak, orobat, zaharkituta daudela iritzi diote.
- Errenta. Pasaitarren errenta erabilgarria EAE-ko bataz bestekoarekin alderatu dute; pasaitarren media ia 15.000 eurokoa da, eta erkidegokoa 19.000 eurokoa.
Oarsoaldeari buruzko kalitatezko informazioa eta gertukoa jaso nahi dudalako. Euskaraz bizi nahi dudalako eta hizkuntzaren biziberritzea bultzatu nahi dudalako.Herrigintza egin nahi dudalako.Oarsoaldeko euskarazko komunitatearen parte izan nahi dudalako. Oarsoaldeko herritarrok behar dugulako.
