Esnabiden 27 etxebizitza sozial eraikitzeko pausoa eman dute
Udalak bere lursail bat lagako dio Etxebizitza Sailari, eta beharrizan bereziak dituztenentzako 27 etxe eraikiko ditu.
Esnabideko plangintzaren infografia [@herribizia]. Errenteriako Udalak jakinarazi duenez, pausoak ematen jarraitzen dute Esnabide eremuan etxebizitza sozialak eraikitzeko, agintaldi planean ezarrita dutenari jarraituz.
Esnabideko planaren arabera, 27na etxebizitzako hiru bloke eraikiko dituzte bertan. Horietako bat udalaren jabetzakoa izango da, eta babes ofizialeko etxebizitzak eraikiko dituzte.
Pasa den astean bilera egin zuten Eusko Jaurlaritzako eta Errenteriako Udaleko ordezkariek. Gasteizko gobernuaren ordezkariak Pedro Jauregi Etxebizitza sailburuordea eta Pablo Garcia Astrain saileko zuzendaria izan ziren. Udal erakundearen aldetik, Aizpea Otaegi alkatea eta Eneko del Amo Hirigintza zinegotzia izan ziren.
Udalak proposatu zuenez, Jaurlaritzari lursail bat lagako diote, hirigintza kargurik gabe, hartara Etxebizitza Sailak etxebizitza sozialak eraiki ditzan.
27 pisu horiek udalerrian identifikatutako beharrei erantzuteko izango dira. Zaurgarritasun handiagoa duten pertsonei zuzenduak bideratuko zaizkie: 65 urtetik gorako pertsonak, guraso bakarreko familiak, indarkeria matxista jasan duten emakumeak…
Etxebizitza sozial berriak alokairu erregimenean izango direla adierazi dute, Esnabideko etxebizitza eskaintza “ikuspegi soziourbanistikotik” orekatzeko.
