'Lehen aldiak' ardatz hartuta heldu da Mugaritzen denboraldi berria
Andoni Luis Adurizek gidatzen duen espazio gastronomikoak maiatzaren 1ean abiatuko du 24. denboraldia, eta urriaren 31 arte izango ditu zabalik ateak.
Mugaritz jatetxea. Argazkia: Oscar Oliva Andoni Luis Adurizek gidatzen duen espazio gastronomikoak maiatzaren 1ean abiatuko du 24. denboraldia, eta urriaren 31 arte izango ditu zabalik ateak. Ilusioz eta indarrez ekingo dio denboraldi berriari sukaldariak, urtarrila eta apirila artean sormen garaian murgilduta aurtengo esperientzia pentsatzen eta diseinatzen izan ostean. “2020ak zerbait oparitu badigu, lehen aldiko ametsarekin tpo egitea izan da, lehengora itzultzeko irrikaz geunden. Mugaritz izaki bizidun bat da, urtero birsortzen dena bere nortasuna bizirik mantenduz, baina gauza bera izan gabe, urtero bere buruaren bertsio berri bat eskainiz: urtero proposamen berri bat, begirada berri bat”, esan du Adurizek.
Proposamen gastronomikoan norbait lehen aldiz musukatzeko gonbidapena, osagai bati lehenengo aldia balitz bezala begiratzearen emaitza, edota teknika berri baten lehen erabileraren emaitza aurki daitekeela gaineratu du sukaldariak.
Sormen garaian, diziplinarteko bokazioak bultzatuta, gastronomiatik kanpoko pertsonak parte hartzera gonbidatzen ditu Mugaritzek. Aurten ere, hala egin du, eta Juan Jose Millas idazle eta kazetaria, Juan Luis Arsuaga paleontologoa, Niño de Elche diziplina anitzeko musikaria, Uxue Alberdi idazle eta bertsolaria, Migeltxo Molina zinemagileak eta Eva Rivera Dock of the Bay dokumental jaialdiko zuzendaria aritu dira. Denen artean, esperientzia inguratzen duen kontaketa eraiki dutela azaldu du Adurizek, “adimenarekin eta zentzumenekin dastatzen den esperientzia”, azken horrek, besteak beste, egiten du berezi Mugaritz.
Desalgoritmo by Mugaritz
Desalgoritmo by Mugaritz iniziatiba sortu du aurten Mugaritzek. Aurrez ezarritakotik ihes egin eta zerbait lehen aldiz esperimentatzean zer sentitzen den jakiteko gonbidapena da. Bide horretan, gaurtik hasita eta hamar egunez, Mugaritzen instagram kontuaren eta plataforma baten bidez, ezarritako logikak apurtzeko gonbidapenak partekatuko ditu Mugaritzek.
Lehen iniziatiba horretan parte hartzen duten pertsona guztien artean, ausaz, bost lagun aukeratuko dituzte. Bost lagun horiek beraiek aukeratzen duten lagun banarekin batera izango dira aurtengo Mugaritzen proposamena dastatzen lehenak, entsegu orokorrean parte hartzeko aukera izango dutelako hilaren 30ean, irekiera ofiziala baino egun bat lehenago.
Maiatzaren 1etik urriaren 31ra bitartean izango da zabalik Mugaritz, egoerak ahalbidetzen badu behintzat, astearte gauetik igande eguerdira maiatza eta ekainean izan ezik; hilabete horietan ostegunetik igandera izango da zabalik. Erreserbak hemen egin daitezke, edo 943 52 24 55 telefono zenbakira deituta.
Hurrengo argazkietan Adurizek denboraldi berrirako sortutako proposamenetako batzuk, eta Aduriz bera. Argazkiak: Mugaritz.
-
- Honakoak dira Andoni Luis Adurizen denboraldi berriko proposamenetako batzuk
