Neurriak: Zer suposatzen du Oarsoaldea eremu gorrian egoteak?
Eskualdeko lau udalerriek 400eko tasa gainditu izanak murrizketak ekarriko ditu bihartik aurrera mugikortasunean, ostalaritzan eta barruko kirolean.
Pasaia eremu gorrian murgildu izanak murrizketak eragingo ditu eskualde osoko ostalaritza establezimenduen barnealdean. 
100.000 biztanleko 400eko intzidentzia tasa metatua gaindituta, eskualdeko lau udalerriak COVID-19aren zonalde gorrian murgildu dira. Hartu beharreko neurri berrien ebazpena gaur atera du Jaurlaritzak argitara, eta beraz, bihar sartuko dira indarrean Pasaia eta Errenteria-Oreretan (Lezo eta Oiartzunen jadanik ezarrita zeuden). Honakoak dira murrizketak:
- Itxiera perimetrala. Udalerriak perimetralki itxita egongo dira, eta alboko herrietara joan ahal izango da, bakarrik, erosketak edo kanpoko kirola egiteko.
- Ostalaritza barruak. Establezimenduen barnealdeetan 06:30etik 09:30era eta 13:00etatik 16:30era bakarrik zerbitzatu ahal izango da. Terrazak orain arte bezala zabalik mantenduko dituzte.
- Kirola barruan. Gune itxietan kirola egiteko, taldeek ezingo dute lau laguneko kopurua gainditu, kirolari federatuak eta profesionalak izan ezik. Aldagelak eta dutxak ezingo dira erabili, igerilekuetan izan ezik -gune horietan %35eko edukiera baimenduta dago, eta baita dutxak bakarka erabiltzea ere-.
Horiez gain, eremu gorrian egon, ala ez, udalerri guztientzako honako arau hauek daude indarrean:
- Etxeratze agindua. 22:00etan biztanle guztiek -baimendutakoak izan ezik- etxean egon beharko dute, goizaldeko 06:00ak arte.
- Ostalaritza. Establezimenduak 06:00etatik 20:00etara bakarrik egon daitezke zabalik. Lokalen gehienezko edukiera %50ekoa izango da barnealdean, eta 100%ekoa kanpoko mahaietan.
- Bilkurak. Gehienez lau laguneko taldeak elkar daitezke, baita etxeetan ere.
