Bi bulego berri, pasaitar autonomo eta ETEak ekonomikoki suspertzeko
Bi lokalek gaur ireki dituzte ateak, Antxo eta Trintxerpen. COVID-19ak eragindako krisiari aurre egiteko aholkugintza eskainiko diete enpresariei.
Bulego bat Antxoko Azokan egongo da, eta Trintxerpeko Alkateordetzan bestea. 
COVID-19ak eragindako krisiaren testuinguruan, Pasaiako autonomo eta ETEei (enpresa txiki eta ertainak) ekonomikoki suspertzen laguntzeko bi bulego ireki ditu udalak Antxoko Azokan eta Trintxerpeko Alkateordetzan. Biak ala biak gaur hasi dira herritarrei zerbitzua eskaintzen, hasiera batean, ekainaren 30era arte.
Aurretik hitzordua eskatu beharko da posta bidez mezua idatziz edota 943 49 41 29 telefono zenbakira deituz. Ordutegia honakoa da:
- Antxo. Astearte eta ostegunetan, 09:30etik 14:00ak arte.
- Trintxerpe. Astelehen, asteazken eta ostiraletan 09:30etik 14:00ak arte.
Lokaletako langileek orientazio eta aholkularitza zerbitzua eskainiko diete enpresariei. Horrez gain, etorkizunari aurre egiteko, egungo arazoak gainditzeko eta aukera berriak identifikatzeko laguntza ere emango diete euren baitako langileei eta erakunde txiki nahiz ertainetako jabeei.
Zerbitzu berria Pasaia Suspertuz iniziatibaren baitan kokatu du Pasaiako Udalak, eta Oarsoaldea Garapen Agentziak jarriko du martxan, Gipuzkoako Foru Aldundiaren babespean. Izaskun Gomez alkateak iritzi dio aholkularitza zerbitzu hori eskaintzea ezinbestekoa dela, “autonomo eta ETEak lan sortzaile nagusiak baitira”.
