COVID-19ari aurre egiteko inbertsioak diruz lagunduko ditu udalak
Merkatari eta ostalariek hilaren 19tik maiatzaren 15era arte aurkez ditzakete egin beharreko inbertsioetan laguntzeko eskabideak.
Udalak hirugarren deialdia egin du ostalari eta merkatarien inbertsioak diruz laguntzeko. 
Udalak hirugarren deialdi bat egin du merkatariak eta ostalariak COVID-19ari aurre egiteko egin beharreko inbertsioak finantzatzen laguntzeko. Eskabideak hilaren 19tik (datorren astelehena) maiatzaren 15era arte aurkez daitezke.
Programaren helburua da diruz laguntzea lokalak eta lan egiteko moduak egokitzeko behar diren inbertsioak, ekipamenduak eta azterlanak, eta baita segurtasun- eta osasun-protokoloak betetzeko ekipamenduko inbertsioak ere. Programa Gipuzkoako Foru Aldundiak finantzatuko du.
Diru laguntzen onuradun izan ahalko dira autonomoak eta merkataritza eta ostalaritzako sektoreko hamar langile baino gutxiago dituzten enpresa txikiak, baldin eta milioi bat eurotik beherako negozio-zifra badute eta honako baldintza hauek betetzen badituzte:
- Jarduera ekonomikoen gaineko zergan alta emanda egotea txikizkako merkataritzaren eta ostalaritzaren sektoreetako epigrafe ekonomikoetan, jarduera hori Pasaian egiten ari direla.
- Zorrik ez izatea Foru Ogasunarekin, Gizarte Segurantzaren Diruzaintza Nagusiarekin eta Pasaiako Udalarekin.
- Ez izatea Dirulaguntzei buruzko Lege Orokorraren 13. artikuluko 2. eta 3. zenbakietan jasotako debekurik.
Hirugarren deialdi honetan, aurreko deialdietako eskatzaileak onartuko dituzte -proiektu berriengatik edo aldez aurretik aurkeztutakoak zabaltzeagatik-, baldin eta emandako ebazpenean ez bada lortu diruz lagun daitekeen gehieneko zenbatekoa.
