Lezoko Udalak errenta aitorpena euskaraz egitera animatu ditu herritarrak
Aitorpena euskaraz egiten dutenek, formulario bat bete, eta bi lagunentzako otordu baten zozketan parte hartzeko aukera izango dute.
Lezoko Udalak, Oarsoaldeko beste udal erakundeak bezala, errenta aitorpena euskaraz egitera deitu ditu lezoarrak. Hori egiteko kanpainan parte hartzen ari da. “Errenta aitorpena euskaraz egitea urrats bat gehiago da ogasunarekin eta, azken batean, gure helburu izan behar duen administrazio publikoarekin harremana euskaraz izateko bidean. Euskararentzako garrantzitsua da zure aukera, zuri gauza gutxi iruditu arren. Zorionez, urtez urte gero eta gehiago dira errenta euskaraz egiten duten Oarsoaldeko herritarrak eta administrazio publikoekin euskaraz egitea erabakitzen duten herritarrak”, esan zuten Oarsoaldeko lau herrietako udal ordezkariek kanpainaren aurkezpenean.
Errenta aitorpena euskaraz egiteko, Gipuzkoako Foru Ogasunetik bidalitako autolikidazio proposamena onartzeko orduan euskaraz egin daiteke. Aitorpena internetez edo modu mekanizatuan ogasunaren bulegoetan aurrez aurre egiten denean ere euskaraz egin nahi dela hauta daiteke aldi berean.
Gainera, Oarsoaldeko lau udalek, Oarsoaldeko Euskara Batzordearen bitartez, bi lagunentzako otordu goxo bana zozkatuko dute herri bakoitzean errenta aitorpena euskaraz egiten duten zergadunen artean. Zozketan parte hartzeko hiru bide izango dira aukeran: zabaldu den drive bateko formularioa betetzea, www.oarsoarrak.eus webeko formularioa betetzea edota leku publikoetan jarriko diren boletoak bete eta entregatzea.
