'Gernika' margolanaren txokolatezko erreplika egiten ari dira Lezon
Hilaren 26ean 84 urte beteko dira Gernikako bonbardaketa izan zenetik. Euskal Gozogileak federazioak bertako gozogintza aintzatetsiko du urteurrena gogora ekarriz.
Hilaren 26an 84 urte beteko dira Gernikako bonbardaketa izan zenetik. Urteurrena baliatuta, berriki sorturiko Euskal Gozogileak federazioa Picassoren margolanaren txokolatezko erreplika egiten ari da Lezoko Salva enpresan, jatorrizko tamainan: 7,70 metroko zabalera eta 3,50 metroko altuera. Helburua lanbidea balioan jartzea da.
Txokolatezko obra Gernikan jarriko dute ikusgai hilaren 25etik aurrera, euskal artisau gozogintzaren sektorea aintzatesteko asmoz. Euskal Gozogileak taldean komunikazio lanetan ari den Xabier Oleagak adierazi du lantzen ari diren piezak ez duela antzeko aurrekaririk: “Zerbait guztiz berria da, inpaktu handia izan dezakeena”.
Federazioa duela hiruzpalau aste sortu zuten Gipuzkoa, Araba eta Bizkaiko gastronomia gozoaren sektoreko hainbat profesionalek —denera 40 bat ari dira prozesuan parte hartzen—. Joan den astetik -—hilaren 6tik, zehazki— ari dira txokolatezko margolanaren sorkuntzan txandaka lanean, eta hilaren azken astean aurreikusi dute hura jendaurrean aurkeztea.