Oarsoaldeko Kontsumo Bulegoaren oharra: kontuz sare sozial bidezko erosketekin
Oarsoaldeko Kontsumo Bulegoak Instagramen edo bestelako sare sozialetan egiten diren erosketen gaineko aholkuak eman ditu.
Oarsoaldeko Kontsumo Bulegoak hainbat aholku eman ditu online erosketak egiteko, arreta berezia jarriz sare sozialetatik iristen diren eskaintzetan. Hasteko: Instagramen eta beste sare sozialetan argitaratzen diren iragarki eta eskaintzekin kontuz ibiltzeko eskatu du bulegoak: “Kasu batzuetan, erosketa egiteko kontaktua Whatsapp bidez egiten da. Ondorioz, saltzaileari buruz dugun datu bakarra bere telefono-zenbakia da. Arazorik izanez gero, ez ditugu erreklamazio bat aurkezteko behar diren datu guztiak edukiko”.
Kasu horietan, ez da jakina izaten erosleak hartu-emana enpresa edo partikular batekin duen. Pertsona partikularra bada, ezin da aplikatu kontsumo araudia bermeei edo atzera egiteko eskubideari dagokionez, hau da, erositakoa ezin da itzuli. “Horrelako erosketetan, normalean, ez digute erosketaren egiaztagiririk bidaltzen, eta transferentzia bidez ordaintzeko eskatzen dute. Kontuan hartu behar da ordainketa mota hauek ezin direla atzera bota”.
Kontsumo bulegoak, aholku zehatz hauek eman ditu online erosketak egiteko. Hitzez hitz daude:
Online denda batean erosten dugunean, erosi aurretik garrantzitsua da salmenta eta itzulketa baldintzak kontsultatzea. Besteak beste, datu hauek ere egiaztatzea gomendatzen dute Kontsumo Bulegoan.
-
Enpresaren datuak (izena edo sozietatearen izena, IFZ, helbidea, helbide elektronikoa eta harekin harremanetan jartzeko aukera ematen duen beste edozein datu). Enpresak Espainian establezimenduren bat badu, Kontsumitzaileen Informaziorako Udal Bulegoan erreklama daiteke. Europar Batasuneko beste herrialde batean badago, Kontsumitzailearen Europako Zentroaren bidez erreklama daiteke, baina EBtik kanpo badago, erreklamazioa ezinezkoa izan daiteke.
-
Ordaindu beharreko prezio osoa (zergak eta bidalketa-gastuak barne) eta ordaintzeko moduak. Kontuan hartu Europako Batasunekoek ez diren eta 22 eurotik gorako balioa duten produktuek aduanan muga-zergak ordaindu behar dituztela.
-
Online dendako webaren segurtasun-maila zerbitzari seguruaren adierazleak (https://), giltzarrapo itxia edo web orri batzuetan agertzen den giltza erabiliz identifika ditzakegu.
-
Erosketa egin ondoren, enpresak dituen datu guztiak eskaera-berrespenean bidali behar ditu.
-
Entregatzeko epea 30 egunekoa da gehienez. Epe hori igarota, enpresak dirua itzuli behar digu, atzerapenik gabe.
-
Produktua jaso ondoren, gutxienez 14 eguneko epea dugu itzultzeko inolako arrazoirik eman gabe (itzultzeko eskubidea). Enpresak itzuli egin behar digu ordaindutako prezioaren kantitatea, bidalketa-gastuak barne, baina baliteke itzulketaren gastuak gure gain hartu behar izatea.
-
Enpresa saltzaileari buruz beste erabiltzaile batzuen informazio eta iritziak bilatzea komeni da, haren fidagarritasuna hobe ezagutzeko.
Oarsoaldeko Kontsumo Bulegoaren telefono zenbakia 943 51 01 11 da (astelehentik ostiralera, 09:00-14:00). Bestela, bulegoaren posta elektronikora mezua bidal daiteke. Informazio gehiago Kontsumobideren webgunean lor daiteke.