50 hilabeteko epea izango dute Galtzaraborda-Antxo-Altza topo saihesbidearen lanek
Eusko Trenbide Sareak gau atera ditu lizitaziora lanak, 73,6 milioi euroko balioarekin. Lanak 2026aren hasierara arte luzatuko lirateke, emandako epeen arabera.
Antxoko geltoki berriaren muntaia. Argazkia: Irekia. Euskal Trenbide Sareak (ETS) lizitaziora atera ditu gaur (hilak 15, osteguna) Altza-Galtzaraborda arteko topoko saihesbidearen lanak. Lanen kostua 73,6 euroan jarri dute, eta horiek egiteko epea 50 hilabetekoa izatea aurreikusi dute. Lizitazio kopuru horren barruan ez dago instalazioen kostua. ETSren intentzioa da urte bukaeran ekitea lanei. Beraz, abenduan hasiko balira, 2026ko hasierara arte luzatuko lirateke lan horiek.
Lanen barruan Antxoko geltoki berria egitea dago, Gure Zumardiaren azpialdean. Horren ondorioz, Azoka eraikina eraitsiko lukete lanei ekiteko, izan ere, Gure Zumardia osoa ireki beharko litzateke lur azpiko geltokia egiteko, ondoren horren gainean egungo plaza izango litzatekeenaren antzekoa berriz ere eraikitzeko. Ikusteko legoke zer gertatuko litzatekeen Azokaren balizko ordezko azpiegitura balioanitzarekin. Gainera, ikusteko dago aldi berean behin geltoki berria eginda, zer gertatuko den egungo topoaren zubiarekin; planteatzen diren asmoen artean hori eraistea dago.
Antxoko geltokiak sarbide nagusia Eskalantegi kalean izango luke, eta Gure Zumardian bertara iristeko igogailua legoke. Bi nasa izango ditu geltokiak (Irunerantz eta Donostiarantz joaten direnentzat), baina horien eta trenbidearen gainaldean atari bakarra legoke, bertatik aukera emanez erabiltzaileei alde batera edo bestera joateko.
Saihesbide berriaren trazatuari dagokionez, Galtzarabordatik Antxorako bidea tunel bidez egingo luke, eta horrek ekarriko luke egungo bidea aldatzea besteak beste Marealta behetik pasatu beharko lukeelako saihesbide horrek lur azpiko geltokira iristeko. Galtzarabordan, egungo kokalekua mantenduko luke estazioak, hara iristeko (Antxotik eta kontrako bidean) trenbidearen trazatua da aldatuko litzatekeena.
ETSk jakinarazi du, behin lanak eginda, 7,5 minutuero izango direla topoak Donostia aldera joateko.
