Biolinak herri musikan izan duen txokoa erakutsiko dute
Herri Musikaren Txokoak eta Abaraxkak antolatzen duten kontzertu didaktikoen dinamikan hurrena Arkaitz Miner biolinistak emango du, bihar.
Arkaitz Miner biolinista. Soinuenea Fundazioak eta Abaraxka Udal Ludotekak urteak daramatzate elkarlanean, musika zein Ergoiengo Herri Musikaren Txokoa haurrengana hurbilarazteko.
Normalean, hilabetean behin elkarrekin zerbait antolatzen dute, eta Soinuenekoek hiru hilean behin, urtaro hasierekin batera, talde bat gonbidatzen dute.
Larunbat arratsaldean ematen dute kontzertua, eta goizean saio pedagogikoa egin ohi dute, haurrei zein bere senideei bideratutakoa.
Horrez gain, uztaileko udalekuetan astero joaten da haur talde bat Herri Musikaren Txokora, herri musikan murgiltzera. Elkarlan horren guztiaren emaitza dira, adibidez, hiru hilabetez, larunbatero, haur zein helduak egin zituzten erraldoiak.
COVID-19a iritsi zen, eta dinamika hori aldatu behar izan zuten, halabeharrez. Abaraxkak eta Soinueneak ordura artekoak berrasmatu egin behar izan zituzten.
Izan ere, jarduera eremua mugatuago izan zuten; jada ezin ziren kanaberak bildu, garbitu eta haiekin musika instrumentuak sortu. Arriskuak ekidin nahi dituzte antolatzaileek, eta orain —oraingoz— kontzertuetara mugatzen dute beraien elkarlana.
Orain arte hainbat musikari gonbidatu dituzte. Zerrenda horretako azkenak izan dira Andoitz Antzizar trikitilaria eta Oiartzungo arozenatarrak (txistulariak). Bihar Arkaitz Miner oreretarraren txanda izango da.
Kontzertu didaktikoa emango du, 17:00etan hasita, Done Eztebe elizan. Instrumentu bat baino gehiago jotzen daki, baina biolina da bere espezialitatea.
Biharko saioa horretan ardaztuko du Minerrek. «Eskainiko dudana izango da, gehienbat, Herri Musikaren Txokoan zergatik irakasten dugun biolina, eta hor garatu duguna», zehaztu du. Izan ere, Ergoienen biolin eskolak ematen ditu, eta Haurtzaro Ikastolan gitarra irakasten du.
Adierazi duenez, azken 7-8 urtean Euskal Herriko musika zein dantza tradizionala lantzen aritu dira Herri Musikaren Txokoan.
Biolina, Euskal Herriko herri musikako instrumentua? Minerrek azaldu du: «Oro har, herri musika biolinarekin jotzen denean, Irlandarekin asoziatzen du. Hemen ez dugu egiten, baina kontua da hemen bai egon zirela biolin jotzaile asko. Kontua da desagertu egin zela hori, eta istorio hori ez dakigu. Oso polita eta interesgarria da».
Berak zein beste biolin jotzaile batzuek «zortea» izan dute dagoen errepertorioa berreskuratu eta beste hainbat musikariekin jotzekoa: trikitilariak, albokariak, xirulariak… «Historia hori ezagutzen joan garen heinean konturatu gara organikoki funtzionatzen duela».
Irlanda, Quebec, Iberiar penintsula zein hainbat txokotako musikak ezagutu ahal izan ditu Minerrek, baina interesgarria iruditu zitzaion hemengo musikarekin ikerketa egitea. Grabaziorik ez zuten aurkitu; bai, ordea, dokumentuak.
Biolina musika kultuarekin lotzen da normalean, eta beraien helburua da herri musika gehitzea horri, «beste herrialdeetan bezala». Ez dira, Minerren ustez, ideia kontrajarriak: «Jo dezakezu musika klasikoa, baina baita herri musika ere, eta biak maitatu. Elkarren artean aberasten dira; musika klasikoarentzat oso garrantzitsua da herri musika, baina baita alderantziz ere».
