Euskal presoen urrunketarekin bukatu eta legedia arrunta aplikatzea eskatu dute udal taldeek
Etxeratek sustatutako 'Euskalduna' adierazpenarekin bat egin dute EH Bilduren eta EAJren udal taldeek. "Iraganeko logikak" atzean uzteko eskatu dute.
Jexux Leonet alkateak, EH Bilduren izenean, eta Janire Mitxelena zinegotziak, EAJrenean, egin dute bat.
Oiartzungo Udalean ordezkaritza duten bi talde politikoek —EH Bilduk eta EAJk— Etxeratek sustatutako Euskalduna adierazpenarekin bat egin dute. Euskal presoen urrunketa politikarekin bukatu, eta espetxe legedi arrunta aplikatzea aldarrikatu dute.
Gainera, “iraganeko logiken araberako espetxe politika” atzean behin betiko uztea elkarbizitzaren eta bakearen alde egingo duela uste dute.
Euskalduna adierazpenaren lau puntuekin bat egin dute EH Bilduk eta EAJk. Honakoak dira:
- Espetxe politika normalizatua eta legedi arrunta aplikatzea euskal presoei.
- Espetxeetako Lege Orokorra bete eta presoek zigorra euren familia eta gizartetik hurbil betetzea.
- Urruntze politikarekin bukatzeko, EAEren kasuan Martutene, Basauri eta Zaballako espetxeetan birkokatzea euskal presoak.
- Horrek guztiak orainaldiko eta etorkizuneko bizikidetza demokratikoan lagunduko duela aldarrikatu.
Euskalduna adierazpena iazko abenduaren 12an aurkeztu zuten Bilboko Euskalduna jauregian EAJk, EH Bildu, Elkarrekin-Podemos, ELA, LAB, UGT, CCOO, STEE, ESK, Hiru, Etxalde, EHNE, CGT eta CNTk.
