Indarkeria matxistaren aurrean eragileen konpromiso "pertsonal eta kolektiboa" aldarrikatu dute
Miarritzeko hilketa salatu dute eguerdian, Oiartzungo Feministen Asanbladak deituta. Indarkeria matxista "lehen mailako arazoa" dela nabarmendu dute.
Plazan elkartu dira hilketa matxista salatzeko. Ostegun goizaldean, 77 urteko gizon batek 75 urteko emaztea hil zuen Miarritzen. Gaur eguerdian, Oiartzungo Feministen Asanbladak deituta, elkarretaratzea egin dute Lapurdiko hiriko hilketa matxista salatzeko. Aurten Euskal Herrian hil duten hirugarren emakumea da.
“Nazkatuta” daudela adierazi dute, eta indarkeria matxistarik ez dutela nahi berretsi dute, “ez Euskal Herrian ez beste inon”. Izan ere, indarkeria mota horrek mugarik ez duela adierazi dute. “Bizi garen sistema kapitalista patriarkalaren ezinbesteko tresna da. Eredu honek sortzen dituen pertsonen arteko botere harremanak bizirauteko eta mantentzeko baliabidea da”.
Indarkeria matxista “lehen mailako arazo politiko, sozial, ekonomiko eta kulturala” dela esan dute, modu isolatu batean ez delako ematen. “Bizi garen jendarte antolamendu sexistak ahalbidetzen eta sustatzen duen indarkeriaren erabileraz ari gara”.
Indarkeria mota horren kontrako borrokan ardura pertsonal eta kolektiboa eskatu diete eragile politiko, sozial zein ekonomikoei, “hezkuntzatik hasita”.
“Gogor salatu nahi dugu hilketa matxista, eta autodefentsarako deia egiten dugu. Gure bizitzak dira jokoan daudenak. Feministok martxan jarraituko dugu, elkarrekin, borrokan, aske izan arte. Erasoen aurrean, denak kalera”.
