Airearen kalitatea neurtzeko gailua jarri du Jaurlaritzak Pasai Antxon
Neurgailua San Pedrora lekualdatuko dute gero eta, besteak beste, portuak sortzen duen kutsaduraren berri emango du. EH Bilduk proposatuta ezarri dute.
Airearen neurgailua Antxon dago orain. San Pedrora lekualdatuko dute gero. 
Airearen kalitatea neurtzeko gailua jarri du Eusko Jaurlaritzak Pasai Antxon, besteak beste, portuak sortzen duen kutsadura kontrolatzeko helburuz. 2019ko irailean EH Bilduk Pasaiako Udalean egindako proposamen bati erantzunez -ondoren bozeramaile guztien artean adostutakoa- ekarri dute neurgailua udalerrira.
Gailu mugikorrak PM10 motako partikulak neurtuko ditu eta Pasai Antxon egongo da hainbat astez; gero San Pedrora mugituz bertan azterketak errepikatzeko. EH Bilduk oso pozgarritzat jo du berria eta azaldu du jasotako informazioarekin pasaitarrentzako soluzioak martxan jarri nahi dituztela: “Portuak eragin ohi dituen afekzioak neurtzea” da helburuetako bat, “ondoren neurri zuzentzaile zehatzak proposatzeko eta dagokionari erantzukizuna eskatu ahal izateko”.
