Lau zatikako zuzenketa aurkeztu dizkio aurrekontu proposamenari PSE-EEk
Alderdi sozialistak, joan den astean jakinarazi zuen ez zuela babestuko gobernu taldeak aurkeztutako aurrekontu proposamena. "Anbizio falta" eta PSE-EErentzat "estrategikoak" diren arloetan "murrizketak" egin izana izan da babes hori ez emateko arrazoia Isaac Palencia bozeramaileak azaldu zuenez.
![](https://oarsoaldea.hitza.eus/site/files/2021/04/dsc0117.jpg)
Alderdi sozialistak, joan den astean jakinarazi zuen ez zuela babestuko gobernu taldeak aurkeztutako aurrekontu proposamena. “Anbizio falta” eta PSE-EErentzat “estrategikoak” diren arloetan “murrizketak” egin izana izan da babes hori ez emateko arrazoia Isaac Palencia bozeramaileak azaldu zuenez.
Gaur berriro azaldu da prentsa aurrean Palencia. Oraingoan, proposamen zehatzak aurkeztu ditu, eta hala, aurrekontu proposamenari lau zatikako zuzenketa aurkeztu dizkiola bere alderdiak jakinarazi du. Guztira, 800.000 euro suposatzen dute proposatutakoek. Lehenengo zuzenketara, 300.000 euro bideratu ditu. Fanderia auzoaren trafikoa berrantolatzeko proiektuak “gardentasun” eta adostasun” falta duelako, horren ordez, etxebizitzen birgaitzerako laguntzak udalerri osora zabaltzeko proposatu du bere alderdiak, eta ez soilik alde zaharrera. Palenciaren ustez, etxebizitzak birgaitzearekin batera, eraginkortasun energetikoa bultzatzen da, aldaketa klimatikoari aurre egiten zaio, eta gainera, tokiko gremioen jarduera ekonomikoa indartzeko balioko du.
Bigarren zuzenketan, gizarte zerbitzuetan jarri du fokua alderdi sozialistak. Hala, aurreko urtean egindako hainbat lan diagnostikoei ekintza planekin jarraipena emateko proposatu dute. Adinekoen bakardadea, pobrezia energetikoa, eta gazte ludopatiari aurre egiteko programetarako 90.000 euroko diru zatia bideratzea proposatu du PSE-EEk. Diru hori, berriz, gobernu taldearen aurrekontu proposamenean Kultura Sailak bitartekaritza eta egonaldi artsitikoetarako programetara bideratutako diru zatitik hartzea proposatu du, “diru zati hori azaltzen da aurrekontuetan, baina exekuzio maila gero oso baxua da. Uste dugu planteatu ditugun proiektuetara bideratzea egokiagoa dela”.
Ingurumen arloa ere txertatu dute zatikako zuzenketetan alderdi sozialistakoek. Puntu horretan, aldaketa klimatikoari aurre egiteko, hondakinen prebentziorako, eta zarataren kontrako planerako 90.000 euro aurreikusi dituzte. “Atlantikaldiak iaz izandako aurrekontu bera izatea proposatzen dugu, eta Hizkuntza Politika departamenduko hainbat proiektu atzeratzea, ez baitira lehentasunezkoak”.
Laugarren zuzenketan berriz, 400.000 euroko diru zatiarekin langabeei begirako enplegu planak, kontsumo bonuak, eta eskolako materiala erosteko laguntzak ematea proposatu du. Hori posible egiteko berriz, Don Boscorako sarbiderako lanak egiteko eta Ondartxoko partzelen erosketarako soberakinetik ordaintzea proposatu du PSE-EEk. Asfaltatze lanetarako diru zatia handitzea, eta udal jabetzarena den Team Latigo gimnasioko dutxa eta komunak berritzea ere sartu du egitekoen zerrendan.
Proposamenak “arrazoizkoak”
Egindakoak “arrazoizko proposamenak” direla uste du Palenciak, eta aurrekontu proposamena “aberasteko” baliagarriak izango diren zalantzarik ez duela gaineratu du: “Udaletxean aurkeztu ditugu zatikako proposamenak, gobernu taldeak negoziaziorako prest zegoela esan zuen, beraz ikusiko dugu zer gertatzen den”.