Arraitokin lur azpiko aparkalekuak eta ekipamenduak proposatu ditu Lezoko PSE-EEk
Joxean Sanchezek jakinarazi du Espainiako Gobernuak portuari eman diola lur eremu hori, eta portuak ez lukeela arazorik Lezoko Udalari emateko.
Lezoko PSE-EEren eledun Joxean Sanchezek jakinarazi duenez, Espainiako Gobernuko Garraio, Mugikortasun eta Hiri Agenda ministerioak agindua eman du Arraitokiko lur eremuaren desafekzioa gauza dadin. Horren arabera, lur eremu hori (4.422 metro koadrokoa), Pasaiako Portu Agintaritzaren esku geratuko litzateke: “Portuak esan du lur eremu horri Lezoko Udalari doan emateko prest dagoela. Horrela, Lezoko herritarren eskera historiko bat gauzatuko litzateke”. Lezoko kiroldegiaren ondoan dagoen lur eremua da Arraitoki.
Behin eremua Lezoko Udalaren esku egonda, Lezoko PSE-EEk badu plana bertarako: lur azpiko aparkalekuak egitea (bi solairu), eta horren gainealdean kirol, kultur eta zerbitzu azpiegiturak, “herriaren beharrei erantzuteko” Sanchezek esan duenez. Horrela, “degradatua” dagoen espazioa herritarren eskura jarriko litzateke Lezoko sozialisten arabera. Kultur ekipamendu proposamenaren xehetasunak eman ditu Sanchezek: “Kulturgunea behar du behingoz herriak, arte eszenikoetarako eta ikus-entzunezkoetarako aretoa izateaz gain, erakusketa gela, herriko eragileentzako aretoak, edo Gazte Informazio Bulegoa lituzkeena”.
Lezoko PSE-EEk mahaiaren gainean jarri duen egitasmoa diruz finantzatzeko Eusko Jaurlaritzarekin eta Gipuzkoako Foru Aldundiarekin adostasunera iristea beharrezkoa dela azaldu du Sanchezek. Udalak ere finantzazioari begira lanean hasi beharko lukeela iritzi du, aurretik diseinuaren eta erabileren gaineko diseinua eginda, azken hori herritarren parte hartzearekin.
