Sindikatuen arabera, erantzun zabala izan du sektore publikoko greba deialdiak
Jarraipen oso orokortua eta erantzun zabala jaso duela grebak esan dute sindikatuek lehen balorazioan, eta gogor salatu dute Eusko Jaurlaritzak ezarritako gutxieneko zerbitzuengatik milaka langile publikoei ukatu diela greba eskubidea, "ondorioz, greba bera oso baldintzatuta egon da".
Errenteria-Oreretako Koldo Mitxelena Herri Ikastetxeko jolastokia hutsik. Sektore publikoan greba deitua dago gaurko. Lehen balorazioa egin dute greba deialdiaren atzean dauden ELA, LAB, CCOO, SATSE, ESK, eta Steilas sindikatuek Araba, Bizkai eta Gipuzkoan greba izaten ari den erantzunarekin. Jarraipen oso orokortua eta erantzun zabala jaso duela grebak esan dute sindikatuek lehen balorazio horretan, eta gogor salatu dute Eusko Jaurlaritzak ezarritako gutxieneko zerbitzuengatik milaka langile publikoei ukatu diela greba eskubidea, “ondorioz, greba bera oso baldintzatuta egon da”.
Eguerdian zituzten deituta sindikatuek manifestazioak, Bilbo, Donostia eta Gasteizen, eta horietan 18.000 lagun inguruk hartu dutela parte esan dute sindikatuek; Bilbokoa izan omen da jendetsuena.
Lehen orduko datuei begiratuta egin dute lehen balorazioa, eta hezkuntza publiko ez unibertsitarioan eta unibertsitarioan izan du jarraipenik zabalena grebak, “ia erabatekoa izan da behin behineko langileen artean”.
Langileen protesta Donibanen. Argazkia: Oarsoaldeko LAB
Oarsoaldera etorrita, eta Oarsoaldeko LAB sindikatuak emandako datuen arabera, ezberdina izan da lau udalen erantzuna. Oiartzungo Udaleko langileen %100ak egin du grebaren alde eta gutxieneko zerbitzuak murriztu egin dituzte. Parte hartzeari erreparatuta hurrengoa, Pasaiako Udala izan da. Bertan langileen %50ak babestu du greba. Gainera, 142 sinadura bildu dituzte behin behinekotasunaren aurka eta jokoan dauden lanpostuen alde eta udal erregistroan aurkeztu.
Lezoko Udaleko langileen artean parte hartzea %47koa izan da; eta Errenteriako Udalaren kasuan, %30ekoa.
Hezkuntzan ere nabaria izan da grebaren jarraipena, batetik bestera aldea izan bada ere. Hala, HITZA-k ikastetxeetako zuzendaritzek emandako datuen arabera, Lezo Herri Eskolako langileen artean lortu du babes handiena gaurko greba deialdiak; bertako langileen %80ak babestu du greba. Errenteria-Oreretako Cristobal Gamon ikastetxean %72ak babestu du greba irakasleen artean, eta sukaldeko langileen %66. Udalerri bereko Koldo Mitxelena Herri Ikastetxeko irakasleen %36ak egin du bat grebarekin, eta hezitzaile laguntzaileen %50ak babestu du. Trintxerpeko Karmengo Ama ikastetxeko irakasleen %31 eta sukaldarien %66k babestu du greba; eta Errenteria-Oreretako Bizarain Ikastolako irakasleen %23k babestu du zerbitzu publikoetan behin behinekotasunarekin amaitu eta lanpostuak babesteko deitutako protestarekin.
Datu bilketa horretan falta dira Errenteria-Oreretako Koldo Mitxelena eta Bizarain BHI zentroetan egin den jarraipena, Lezo Institutukoa, baita Oiartzungo Elizalde Herri Eskolarena ere. HITZA-k ez ditu datu horiek eskuratu.
Garraio publikoko langileen artean eskualdean zein jarraipen izan duen jakiterik ere ez du izan.
Osasungintza publikoan ere izan du eragina gaurko grebak. Araba, Bizkai eta Gipuzkoan, Osakidetzan ezarritako gutxieneko zerbitzuek “guztiz baldintzatu” dutela grebaren jarraipena salatu dute sindikatuek.
Pasaiako udaleko langileek 142 sinadura bildu dituzte jokoan dauden lanpostuen alde eta behin-behinekotasunaren aurka. Argazkia: Oarsoaldeko LAB.dute sindikatu deitzaileek, “zerbitzu askotan %100eko gutxieneko zerbitzuak ezarri ditu Osakidetzak langile asko eta askoren greba eskubidea urratuta”. Hala ere, greba zerbitzu eta esparru askotan nabaria izan dela esan dute, batez ere, lehen mailako arretan.
Emandako datuak behin-behinekoak dira eta bihar zehaztasun handiagoz jakin ahalko da greba deialdiak izan duen jarraipen zehatza. Sindikatuek emandako datuen arabera, Araba, Bizkai eta Gipuzkoan 60.000 langile daude behin-behineko egoeran, “horien enplegua kontsolidatzeko eta sektore publikoan ematen den pribatizazio politikarekin amaitzeko bere esku dagoen guztia egin behar dute urgentziaz gure agintariek eta alderdi politikoek. Gaurko erantzuna ikusita, greba deitzaileek argi daukagu helburua lortu arte borrokan jarraituko dugula”.
