Zamatete eremuko azken partzelaren hirigintza hitzarmena, jendaurrean
Proposamenaren jendaurreko erakusketa fasea zabaldu dute, 20 eguneko epean. Lursailean 71 bizileku eraikiko dira: 32 etxe libreak eta beste 39ak BOEak.
Gaituko den partzelak 2.016 metro koadro ditu, eta lur horiek bizitegi-gunea eraikitzeko erabiliko dira. 
Pasaiako Udaleko Hirigintza, Etxebizitza eta Ingurumeneko zinegotzi ordezkari den Nahikari Otermin Soroak jakinarazi du hilaren 15ean Jose Maria Abad Urruzola jaunak Pasai San Pedroko Zamatete eremuko C partzelari dagokion hirigintza hitzarmen proposamena aurkeztu zuela Pasaiako Udalean, eta hurrengo egunean udal arkitekto teknikoak adierazi zuela ez dagoela eragozpenik hitzarmena proposatutako terminoetan sinatzeko.
San Pedroko Zamatete auzorako Plan Berezia behin betiko onartu zuten 2016ean eta eremuko birpartzelatze proiektua hiru zatitan banatu zuten (A, B eta C-a, hurrenez hurren); horien artean dagoeneko gauzatu dira lehen bi lursailen lanak eta hirugarrena (C) gaitzea da gelditzen dena. Azken horren eraikuntza proiektua, nahiz bertako eraikinen eraiste plana, hitzarmena sinatzetik bi hilabeteko epean aurkeztuko dituzte.
Hitzarmen berria sinatzearekin batera, udalak konpromisoa hartu du C partzelan eraikiko diren Babes Ofizialeko Etxebizitzen (BOE) onuradun izateko baldintzak zehazteko. Besteak beste, Pasaian erroldatuta (edo lotetsita) egon beharko dute bizilekuen jabeek eta hainbat kolektibo zehatzi etxebizitzen kupo bat zuzenduko zaie.
Etxebizitzak
Gaituko den partzelak 2.016 metro koadro ditu, eta lur horiek bizitegi-gunea eraikitzeko erabiliko dira osotasunean. Gehienez ere 71 bizileku eraikiko dira, horien artean 32 etxe libreak izanik eta gainontzeko 39ak BOEak. Etxebizitzen tipologiari dagokionez, hainbat zatitan banatu dute plana: Bi soto solairu, beheko solairua eta zazpi goi-solairu eraikiko dituzte partzelaren zati batean; eta sei goi-solairu eta bost goi-solairu partzelaren gainontzeko zatian.
Gauzak horrela, egoki izapidetzeko derrigorrezkoa den jendaurreko erakusketa fasea zabaldu dute, 20 eguneko epean. Hirigintza hitzarmenak jendaurreko erakusketa fase horren ostean onartuko dira.
