Talka bulegoa, ehun ekonomikoari eusteko
Errenteria-Oreretako ehun ekonomikoari eustea du helburu bulegoak, eta gehien kolpatutako edo zaurgarrien direnei laguntza tresnak eskaintzea.
Talka Bulegoaren aurrean egin dute agerraldia. Errenteriako Udalak Talka Bulegoa jarri du martxan. Gaur eguerdian eman du horren berri, bulegoaren egoitza aurrean, Aizpea Otaegi alkateak, Oarsoaldea Garapen Agentzia, Torrekua, Ostari, Errenkoalde, Don Boscoko kideekin eta Eneko del Amo zinegotziarekin batera.
Errenteria-Oreretako ehun ekonomikoari eustea du helburu bulegoak, eta gehien kolpatutako edo zaurgarrien direnei laguntza tresnak eskaintzea. Egungo testuinguruan ezinbestekoa dela udalerriko enpresa, negozio eta pertsona autonomoei laguntzeko ekintzak bultzatzea esan du alkateak, “enpresek aurrera egin dezaten”. Talka bulegoa, Oarsoaldea Garapen Agentziaren bidez eta Gipuzkoako Foru Aldundiaren Ekonomia Sustapen Sailaren laguntzarekin abiatu du udalak bulego berria.
“Iaz talka Planaren bidez hainbat sektore eta kolektibori laguntzeko neurriak jarri ziren, eta udalak uste du orain momentua dela baliabide kirurgikoak jartzeko, askotariko zailtasunak dituzten negozio ezberdinei erantzuteko”, azaldu du Otaegik.
Bulegoa pertsona autonomoei, negozio eta enpresei hurbileko orientazioa eta aholkularitza zerbitzua eskaintzeko jarrai dute martxan, bereziki merkataritza, ostalaritza, zerbitzuak, kultura eta abarri begira. Honakoa izango da prozesura, zerbitzura jotzen duten negozioei diagnostiko bat egiten lagunduko zaie, haien ahuleziak eta aukerak zeintzuk diren identifikatuz eta diagnostikoaren arabera zer aldatu daitekeen identifikatu eta aldaketa horiek egiteko laguntza emango zaie. Horrekin batera, testuinguru konplexu eta zalantzazko horretara egokitutako ekintza ildo berriak proposatzen ere lagunduko zaie.
Talka bulegoarekin batera, gainera, Talka Sarea martxan jarri dutela zehaztu du alkateak, ehun ekonomikoa osatzen duten eragileekin: “Helburua da ‘antena’ lana egitea, zailtasunak antzemanez eta zerbitzuari aholkularitza emanez”.
Proiektua bizia dela ere nabarmendu du Otaegik, eta horrenbestez, zerbitzua eta laguntza beharren arabera zabaltzeko aukera emango duela.
Datozen egunetan informazio saioa egingo dute eragile horiekin.
Suspertuz sarearen barruan
Talka bulegoa, zabalagoa den Suspertuz bulego sarean txertatuta dago. Oarsoaldean, dagoeneko, 120 enpresek eta autonomoek zerbitzu eskaera egin dute, eta horien artetik %32,5 Errenteriakoak dira, 39 enpresa zehazki. Errenteriako Udalak, gainomntzeko enpresak eta autonomoak animatu ditu zerbitzu eskaera egin eta aldaketa prozesua abian jartzera.
Talka Bulegoa Errenteriako Turismo Bulegoaren espazio berean dago kokatuta, Madalen kalea 3, eta asteartetik larunbatera izango da zabalik 10:00etatik 14:00ak arte. Zerbitzuan hitzordua eskatzeko web orriaren bidez, 943 49 41 29 telefono zenbakira deituta, edo bulegoan bertan adierazitako ordutegian egin daiteke.
Informazio gehiago, hemen eskura daiteke.
