Oiartzungo abeltzainek erantzun diete Eguzkik leporatutakoei
Apirilaren 3ko sutea "nahita" piztutakoa izan zela adierazi zuen Eguzkik, "abeltzaintzaren interesengatik". Abeltzainek beren jarduera "kriminalizatzea" gaitzetsi dute.
Sutea piztu zen tokia animalientzako bazka tokia ez dela adierazi dute abeltzainek. Hilaren 3an, sute batek Iruarrita eta Urkullu inguruko hamabi hektarea erre zituen. Eguzki talde ekologistak ohar baten bidez salatu zuenez, “abeltzaintzaren interesekin” lotutako “nahita piztutako sutea” izan zen.
Horren harira fiskaltzari eta aldundiari eskatu zioten ikerketa bat hastea. Gainera, Oiartzungo Udalari galdegin zioten abeltzainek jasotzen duten urteroko diru laguntza kentzea.
Oiartzungo abeltzainek erantzun egin diete, ohar baten bidez, Eguzkik esandakoei. Bere horretan jasoko dugu:
Iruarrita eta Urkullu inguruan gertatutako suaren egiletza abeltzainoi egoztea oso larria da. Inolako frogarik gabe horrelako adierazpenak egiteak abeltzainok kriminalizatzeko gogoa eta asmoa besterik ez ditu erakusten.
Garbi adierazi nahi dugu kontrolik gabeko suak pizten diren bakoitzean haien kalte zuzena abeltzainok jasaten dugula, gure abereak erretzen direlako, edo bazkarik gabe gelditzen direlako, besteak beste.
Abeltzainok sute hura piztu genuela baieztatzeak, nabarmen uzten du gure jardunari buruzko ezjakintasuna. Gainera, kontuan hartuta, abereak ez direla inguru horretara joaten animaliei buruzko ezagutzarik eza erakusten du.
Urteak dira elkarlanean, Udala, Aldundia eta Abeltzainen Elkartea, mendi publikoak kudeatzen ari garena. Guk ere eskatzen dugu baso sute horri buruzko ikerketa egitea, horrelako suteen aurrean lehen kaltetuak gu garelako eta horrelako egoerak ezin direlako onartu. Baina ezin da ezta ere onartu, abeltzainok kriminalizatzea inolako frogarik gabe eta ezagutzarik gabe.
Adierazpen honekin bat egiten dute:
-Gipuzkoako EHNE
