Ondartxoko obrak, esleituta; bidea lau hilabetetan irekitzea aurreikusi dute
Aste honetan esleitu ditu udalak pasealekuko lanak, 288.618 euroko aurrekontuarekin. 3 metroko altuerako hesia ezarriko dute bidearen zati handi batean.
Aurreikuspenen arabera, uda amaitu aurretik gozatu ahal izango dute berriro sanpedrotarrek Ondartxo bideaz. 
San Pedroko farora eta puntetara doan Ondartxo pasealekua berrirekitzeko egin beharreko egonkortze lanen proiektua esleitu duela iragarri berri du udalak. Obrak egiteko lau hilabetekoa epea aurreikusi dute, eta 288.618 euro inbertituko dira.
Aste honetan formalizatu da Pasaiako Udalaren eta Construcciones Urdinberri S.L. enpresaren arteko kontratua, San Pedroko bidean ezpondak egonkortzeko obrak egiteko. Azken urteotan, hainbat eta hainbat luizi izan dira mendi magal hartan, eta oinezkoen segurtasuna bermatu ezinagatik, Pasaiako Portu Agintaritzak (PPA) hura ixtea erabaki zuen 2020 urte hasieran.
Konponbidera heltzeko bidea korapilatsua izan da oso, udala ez baita kaltetutako partzelen jabe eta horien titulartasuna herritar batek baino gehiagok duelako. Gainera, PPArena da bidearen eskumena.
Azkenean, Aldundiko Mugikortasuneko eta Lurralde Antolaketako Departamentuaren finantziazioari esker gauzatuko ditu udalak egonkortze lanak, subsidiarioki. Ordainetan, partzelen titularrek lur eremu horiek udalari emango dizkiote.
Lanen nondik-norakoak
Nagusiki, 3 metroko altuerako hesi dinamiko bat instalatuko dute pasealekuaren zati handi batean, bai eta jarduketa puntualak egin ere, aztertutako eremu bakoitzerako espezifikoak izango direnak.
Jarduera horiek ezpondak ziurtatzea dute asmo, eta Ondartxo pasealekua berriro irekitzea ahalbidetuko dute, herritarrei aukera emanez berriro barrutiko puntetara eta farora heldu ahal izateko. Obraren hasieran, kaltetutako azalera guztia kenduko da, langa jartzeko.
Egonkortze lanek 288.618 euroko aurrekontua dute, BEZ barne, eta lanak egiteko lau hilabeteko epea aurreikusi dute.
