Bide berriak Antxoko bulebarraren alde: Eusko Legebiltzarrera jo dute
Tren Geltoki Berriaren Plataformak legebiltzarkide diren talde guztiei helarazi die herri proposamena. Joan den astean Diputatuen Kongresura eraman zuten plana.
Dozenaka lagunek egin zuten bat joan den asteko mobilizazioarekin. Hurrengoa maiatzaren 7an izango da. 
Pasai Antxoko Tren Geltoki Berriaren Plataformak Eusko Legebiltzarreko talde guztiekin jarri da harremanetan galdegiteko barrutiko tren geltokiaren zati bat bulebar bilakatzeko herri proposamena babes dezaten. Aurreko astean proiektua Diputatuen Kongresura eraman zuten, “alkateak nahiz Pasaiako Udalak erakutsitako axolagabekeria” ikusita.
Bien bitartean, Plataformako kideak eta proposamena babesten ari diren antxotarrak ostiralero ari dira biltzen Gure Zumardian, 20:00etan -hileroko azken ostiralean izan ezik-. Joan den astean dozenaka lagunek egin zuten bat mobilizazioarekin, barrutia inguratuz.
