EAJk "errespetua, aniztasuna eta erlijio askatasuna bermatzearen" alde dagoela berretsi du
Asteazkeneko plenoan laikotasunaren gaineko mozioan kontrako botoa ematearen xehetasunak eman dituzte. Eukaliptoari buruzkoa ere hizpide izan dute.
EAJren udal taldeak dituen bost zinegotzietako hiru. Asteazkenean egin zuten apirilari dagokion udalbatzarra. Gai zerrendan bi mozio izan zituzten. Lehena, eukaliptoaren landaketari dagokiona. Bigarrena, Laikotasuna helburu. Berdintasuna bermatu, askatasuna bermatu izenekoa. Bi kasuetan kontrako botoa eman zuten, eta horren gaineko xehetasunak eman dituzte.
Basogintza hizpide izan zuen mozioan, EAJren udal taldeak eredu ekonomiko horrek ingurumenean —besteak beste— dituen ondorioak laudatu zituen. “Basogintza eta baso kudeaketak ekonomian, enpleguan, bioaniztasun sortzaile gisa, ingurugiro zainketan eta zerbitzu ekosistemako sortzaile gisa jokatu duen eta jokatzen ari den papera aitortu egin behar da”, adierazi dute.
Jeltzaleen udal taldearentzat egungo arazo nagusienetako bat baso kudeaketaren abandonua da. Horregatik, instituzioen arteko lankidetza eskatu dute, basogintza sektorearekin elkarlanean.
Zuhaitz espezien egokitasunarekin ika-mikarik ez sortzea eskatu dute. “Baso kudeaketa eza izanik arazo nagusiena, baso kudeaketa sustatzerakoan ez dadila espezieen neurri gabeko borroka antzuetan erori, espezie bat edo beste arriskutsu edo kaltegarri landatzen den kopuruaren arabera bihur bai daiteke, ez espeziearen izaera bera kaltegarria delako”.
Horrela, udalari eskatu zioten aldundiaren baso politikarekin bat egin dezala. Alegia, eukaliptoa modu kontrolatuan landatzen utz dezala, debekurik gabe —mozioak hori eskatzen zuen— eta baso jabeen ekimena lagunduz.
“Laikotasuna, bermatuta”
Laikotasuna elkarteak aurkeztutako mozioari dagokionez, esan dute ez daudela jabetza erregistroari inmatrikulazioak eskatu eta publikatzearen kontra. Mozioko beste puntu batzuk udalaren esku ez daudela gaineratu dute, hala nola Ondasun Higiezinen zerga ezartzearena.
Horrez gain, laikotasun eskubidea Oiartzunen “guztiz bermatuta” dagoela nabarmendu dute, horretarako baitaude beilatokia, udaletxeko areto nagusia edo, obrak bukatzean, Mendiburu 14.
“Bestaldetik”, jarraitu dute, “udalak diruz laguntzen dituen jaien egitarauetan eta beste ekintzetan eliza ez laguntzea dio mozioak. Udalak jai batzordeak diruz laguntzea eta jai batzordeek meza nagusia dagoela adieraztea beraien jaien programetan, ez da elizari diru-laguntzea ematea”.
Horrez gain, adierazi dute udalak ez duela inolako harremanik Eliza Katolikoarekin, elkarrekiko “erabat independente” direla.
Gainera, azpimarratu dute Laikotasunaren mozioak “Eliza Katolikoaren kontrako intentzionalitate argia” zuela. Onartu dute gauza asko ez dituztela ongi egin, baina Euskal Herriko elizak hainbat ongi egin dituela. Adibideak jarri dituzte: Manuel Lekuonak bertsolaritzaren alde egindako lana; haren anaia Martin fusilatua izatea, “euskalduntasunaren alde egiteagatik”; hasierako ikastolei emandako babesa…
