Herriaren izena koadroetan defendatuko dute
Etzi hasiko da Gipuzkoako Herriarteko Pilota Txapelketa. Oiartzungo palistak Olaberrikoen kontra neurtuko dira. Kanporaketa "%50ean" dagoela esan dute. Esku huska ari direnak, bi aste barru.
Etzi jokatuko dituzte lehenengo bi partidak, Madalensoron bertan. Iazko ekitaldia bertan behera geratu ondoren, asteburu honetan hasiko da Gipuzkoako Herriarteko Pilota Txapelketa. Oiartzuarren aldetik, palistak izango dira txapelaren bidea urratzen lehenak. Etzi neurtuko dituzte indarrak Olaberriaren kontra; goierritarrek duela bi urte eraman zuten txapela.
Joseba Azpiroz, palista izateaz gain, taldeko ordezkaria da. Berarekin batera arituko dira Orkatz Argote, Iker Mujika, Aitor Leonet, Mattin Kazabon eta Jon Irigoien. «Ziurrenik, jokalari gehien dituen taldea gara», esan du Azpirozek. Astebururo lauk bakarrik jokatuko dute, gomazko pilotarekin pala motzean, eta larruzkoarekin paletan; beharraren eta egoeraren arabera osatuko dituzte bikoteak.
Palistak jo eta ke ari dira entrenatzen.
Azaldu duenez, kanporaketara ez dira %100ean iritsiko, lesio eta lan kontuak direla medio. Hala ere, kanporaketa irekia espero dute, inor gutxietsi gabe. «Gutxi gara palaren munduan, eta guztiok elkar ezagutzen dugu: talde gogorra da Olaberrikoa». Oiartzuarren helburua txapelketa irabaztea da, baina dibertitzearena jarri dute horren gainetik.
Esku huska dabiltzanak, berriz, jo eta ke ari dira lanean. Oraindik aste pare bat falta zaizkie lehian hasteko, eta dena fintzen ari direla oraindik esan du Asier Retegi ordezkariak. Azkoitia dute zain, eta esku huska ari direnek ere, lehenengo partidak Madalensoron jokatuko dituzte. «Kanporaketaz kanporaketa joan nahi dugu, ahal den guztia emanda», adierazi du Retegik.
Jakinarazi duenez, pilotari batzuk eskuetako arazoekin ibili dira, baina hilabete inguru daramate zainduz, herriartekoan pentsatzen. «Denak topera egoteko itxaropenarekin gaude. Egia da oraindik batzuk justu samar dabiltzala».
Senior, gazte eta kadete mailetako partidak jokatzen dituzte, eta oraindik ez dute zehaztu nork jokatuko dituen. «Hiru talde orekatu aterako ditugu. Bakoitzak bere postua irabazi beharko du», gaineratu du Retegik. Taldearen harrobiak fruituak ematen ditu.
Azkoitia da txapel gehien bildu dituen taldea, baina oiartzuarrak ez ditu haren izenak kikilduko: «Badaukat esperantza zerbait egiteko, talde polita daukagulako. Aurkari guztiak errespetatu behar dira. Ez dut gezurrik esango: tokatzen zaiguna tokatzen zaigula, aurrera egiteko aukerak baditugu. Ez dut ikusten inor baino gutxiago garenik. Baina ez dugu gure burua irabazletzat jotzen».
