[Galeria] Oiarperen apalategian hiru txapel gehiago daude
Axel Lasak, Unax Landak eta Oier Zabaletak beren finaletan gailentzea lortu dute asteburuan. Orokorrean, hamabi partidatik bederatzitan nagusitu dira.
Ibaetako finaletako partaideak: Mirian Arraiza Izurungoa; eta Oiarpeko Axel Lasa, Ekain Mitxelena eta Oier Zabaleta. Oiarpeko pilotariek lau t’erdiko bost final zituzten programatuta pasa den astebururako, lau jokatu dituzte eta hirutan nagusitu dira.
Erlaitz Iriartek Nagusien Bigarren Mailako finala jokatu zuen ostiralean, Soraluzen, Ander Ibarluzearen kontra. Lazkaotarraren kontra ezin izan zuen, 22-18 galdu baitzuen oiartzuarrak.
Oiartzunera esku hutsik iritsi ez zirenak hiru pilotari izan ziren. Unax Landa Gazteen Bigarren Mailako txapeldun izan da, Ekialdeko konferentzian. Ugaitz Iriarteren ordez sartu zen finalerdietan, eta Sasiain zestoarrari 5-22 irabazi zion igandean jokatutako finalean.
Gaztetxoen Lehenengo Mailan, oiartzuarren arteko finala jokatu zuten, Donostiako Ibaeta auzoko pilotalekuan. Oier Zabaletak 22-16 irabazi zion Ekain Mitxelena taldekideari. Mitxelenak Oihan Etxeberriaren ordez jokatu zuen finala, bigarren horrek eskuetan min hartu baitzuen bezperan.
Gaztetxoen artean, baina Hirugarren Mailan, Axel Lasak 22-18 irabazi zion Izurun Pilota Eskolako Arraizari, Ibaetan baita ere.
Oiarpekoek bosgarren final bat jokatu behar zuten, Nagusien Bigarren Mailan. Mikel Aranburu eta Egoitz Etxabe taldekideek elkarren aurka jokatu behar zuten, baina bertan behera geratu behar izan zen. Etxabe konfinatua egon da, eta ahal denean jokatuko dute finala, Madalensoron.
Jokatutako finalak kontuan hartuta, dozena bat partidako kartelera izan dute oiartzuarrek. Asteburuaren balantzea positiboa izan da, bederatzi partida irabazi baitituzte.
-
- Unax Landa, Gazteen Bigarren Mailako (Ekialdea) txapeldun.
-
- Gazteen Lehen Mailako Ekialdeko finala Ekain Mitxelena txapeldunordea eta Oier Zabaleta txapelduna.
-
- Gazteen Hirugarren Mailako (Ekialdea) finala: Izurungo Mirian Arraiza eta Axel Lasa oiartzuarra.
-
- Erlaitz Iriarte, txapeldunorde Nagusien Bigarren Mailan.
