Nafarroa etorbideko abiadura maximoa 30era jaitsi du udalak
Orain arte 50 km/h-koa zen errepide horretako gehieneko abiadura. Udal arduradunek adierazi dute istripuak murriztea dela neurri berriaren helburua.
Abiadura muga berriaz ohartarazteko seinaleak jarrita daude dagoeneko Nafarroa etorbidean. 
Antxoko Nafarroa etorbidean gehieneko abiadura orduko 50 kilometrotik 30era murriztu du udalak. Muga berriaren xedea zirkulazio istripuak murriztea dela adierazi dute: “Neurri horren helburua da ezbehar-kopurua murriztea eta kolektibo ahulenak babestea, haurrak eta adinekoak, bereziki”.
Abiadura muga berria hil honetan sartu da indarrean. Horrekin batera, errepide horretako seinaleak berrituko dituztela adierazi dute udal arduradunek, seinale osagarriak jarriz leku estrategikoetan, legez kanpoko maniobrak eta maniobra arriskutsuak saihesteko. Izaskun Gomez alkateak gaineratu du abiadura muga murriztea eta seinalizazioa direla Antxoko errepideetan “segurtasuna hobetzeko modurik eraginkorrenak”.
Azken hilabeteotan hainbat istripu eta gertakari puntual jazo dira Nafarroa hiribidean. Errepide horren alde batean tren eta autobus geltokia daude eta asko dira, besteak beste, egunero hor autobusa hartzeko errepidea gurutzatzen duten duten ikasleak.
Zirkulazio Erregelamendua aldatzen duen 970/2020 Errege Dekretuaren 50.5. artikuluan hau ezartzen da: “Zeharbideetako abiadura-muga orokorra 50 km/h-koa da mota guztietako ibilgailuentzat. Muga hori murriztu ahal izango da Udal Agintaritzak bidearen titularrarekin hala adosten badu, aldez aurretik berariazko seinaleztapena eginda”.
