Larunbatean, Saldisetik Jaizkibelera, presoen alde
Sareren Izan Bidea dinamikaren barruko mendi martxa egingo dute larunbatean. 09:00etan dira ateratzekoak Karlos Saldise plazatik.
Izan Bidearen barruan lezoarrek Jaizkibelera egindako martxa baten artxiboko irudia. Sarek erronka luzatu die euskal herritarrei larunbaterako: 650 mendi tontor zapaltzea euskal presoen eskubideen alde. Lezoarrek Izan Bidea egitasmoaren barruko jarduerarekin bat egiteko aukera izango dute, herriko martxa 09:00etan delako abiatzekoa Karlos Saldise plazatik.
Plazatik mendirako bidea hartu, eta pasaitarrekin egingo dute bat han (08:30ean dira ateratzekoak pasaitarrak Donibaneko Santiago plazatik). Behin tontorrera helduta, talde argazkia izango da.
Izan Bidea dinamikaren barrukoa da 650 Tontor egitasmoa. Izan Bidearekin, euskal herritar adina kilometro egin nahi dituzte euskal presoen alde.
