Oinarrizko errentaren aldeko herri ekinaldi legegilearen nondik norakoak, Xenpelar Etxean
Araba, Bizkaia eta Gipuzkoan baldintzarik gabeko oinarrizko errenta baten aldeko HEL herri ekinaldi legegilea aurkeztu dute. Errenteria-Oreretan horren gainekoak azalduko dituzte.
Baldintzarik gabeko oinarrizko errenta bat eskatzeko herri ekinaldi legegilea erregistratu zuten otsailean Eusko Legebiltzarrean. Horren bidez, pobreziarekin amaitu nahi dute sustatzaileek. Ekinaldiaren gaineko informazioa lehen eskutik zabalduko dute hilaren 13an, osteguna, Xenpelar Etxean GOT Grupo Oarso Taldeak antolatu duen saioan, 19:00etatik aurrera.
Baldintzarik gabeko oinarrizko errentaren herri ekinaldi legegilea, Araba, Bizkai eta Gipuzkoako herritar bakoitzak ordain bat jasotzea proposatu du, 270 eta 900 euroren artekoa. Horren arabera, 18 urtetik gorako herritarrek 900 euro jasoko lituzkete, 14 eta 18 urtetik beherakoek horren erdia, hau da, 450 euro, eta 14 urtetik beherakoek %30, 270 euro.
Hori ekinaldi legegileak jasotzen duen puntuetako bat da, xehetasun guztiak datorren asteko saioan emango dituzte antolatzaileek. Tresna berriak, pobreziarekin amaitu, bizitza erdigunean jarri, enplegua eta lanak banatu, ondasuna banatu, erabakitzeko autonomia izan eta modu iraunkorragoan bizitzeko balioko duela azaldu dute saioaren antolatzaileek.
GOT Grupo Oarso Taldea eta Oreretako Mugimendu Feministak ekinaldia babestu dute.