Meme eta irudien ondoren, ipuin laburren txanda izango da
Ttur-tturrek ipuin laburren lehiaketa abiarazi du, irudien erronkan erabilitako oiartzuerazko hitzen bat sartuta. Ekainera arte dago egiteko epea.
Ekainaren 13ra arte egongo da ipuinak idazteko epea. Ttur-ttur Euskaltzaleon Bilgunearen oiartzuerazko hitzekin osatu beharreko irudi eta memeen erronka azken astean sartu da. Hamar hitz proposatu dituzte guztira.
Hala ere, oiartzuerazko hitzak sustatzen jarraitu nahi dute. Horregatik, ipuin laburren lehiaketa abiarazi nahi dute. Orain arte landutako hitzetako bat —gutxienez— erabili beharko da ehun hitzeko —gehienez, kasu honetan— ipuin laburra osatzeko.
Parte hartzaile bakoitzak nahi beste lan aurkez ditzake, eta jatorrizkoa eta argitaratu gabea izan beharko du. Gaiari dagokionez, librea izango da, hitz horietako bat(zuk) sartuta. Aurkezteko azkeneko eguna ekainaren 13a izango da.
E-posta bidez bidali beharko dira, Oiartzuarren Baitan-en helbide elektronikora. Mezu horretan bi fitxategi atxiki beharko dira: batean, idazlana ezizenez sinatua; bestean, egilearen izen-abizenak eta telefono zenbakia.
Sariak izango dira. Lehenengo saria Kastro kafetegiak eskainitako gosari bat izango da. Bigarrena, berriz, Paeta zaharrak erantzun! mahai jokoa. Epamahaikideak Ttur-tturrek izendatuko ditu, eta erabakia aldaezina izango dela erabaki dute.
Hitzak
- Deus.
- Izu.
- Heldu.
- Aixa.
- Auro.
- Arront.
- Marru.
- Gotti.
- Betti.
- Ttur-ttur.
- Ongi.
