Erronka zaila izango du Pasaia Kayak-ek asteburuan Pontevedran
Ur lasaietako Espainiako Piraguismo Txapelketa maratoi modalitatean jokatuko da, eta bertan izango da Pasaia Kayak taldea.
Maddi Tarragona joan den larunbateko Euskadiko Txapelketan, lehorreko zatiari lasterka ekiteko prest. 
Bihartik aurrera jokatuko da Pontevedran (Galizia) ur lasaietako Espainiako Piraguismo Txapelketa maratoi modalitatean, eta bertan izango da Pasaia Kayak taldea.
Maddi Tarragona errenteriarrak larunbatean lortutako txapela estreinatuko du kadete kategorian eta, klubeko arduradunek aitortu dutenez, “bera izan liteke pasaitarren baza nagusietako bat, oraindik sasoirik onean ez badago ere”. Maialen Vitoriak osatuko du pasaitarren ordezkaritza kategoria honetan, 11.800 metroko distantzian, lehorreko 2 tarterekin.
Laura Zunzunegi antxotarra ere top-10ean sartzeko lehiatuko da, 19.000 metroko eta lehorreko lau tarte izango dituen proban. Eskarmentua baduela aitortu dute: “Euskadiko Txapelketako esperientzia baliagarria gerta dakioke esfortzua ondo neurtzeko”. Asier Amiama trintxepetarrak, aldiz, 26.200 metro egin beharko ditu guztira 23 urtez azpikoen kategorian, lehorreko 6 tarterekin.
Ion Carballo eta Iñigo Loisek osatutako K-2a igandean lehiatuko da. Lan gogorra izango dute aurretik, 29.800 metro eta lehorreko 7 tarterekin, baina proba indibidualari uko egin diote taldekakoa ondo prestatzeko, eta itxaropentsu ageri dira, 2019an Bilbon jokatutako Espainiako Ibaietako Txapelketan top-10ean sartzea lortu zutela gogoan.
