Hiru txapeldun titulu eta beste bost domina lortu ditu Pasaia Kayak taldeak
Duela bi urte lortutako bigarren postua errepikatu dute pasaitarrek Euskadiko Ur Lasaietako Piraguismo Txapelketan. Uribarri-Ganboan izan da lehia.
Hiru txapeldun titulu eta beste bost domina lortu zituen Pasaia Kayak taldeak larunbatean Uribarri-Ganboako (Araba) urtegian jokatutako Euskadiko Ur Lasaietako Piraguismo Txapelketan, maratoi modalitate berezian. Lehiakideak ondo moldatu ziren zirkuitura eta lehorretik piragua eskutan lasterka egin beharreko tarteak planteatzen dituen zailtasunetara.
Kadeteek eman zioten hasiera txapelketari, eta denboraldi honetan lehenengo proba jokatzen zuen Maddi Tarragona errenteriarrak erraz gainditu zituen bere aurkari guztiak, 3 minututik gorako aldea ateraz hurrengoari. Urrea lortu zuen, halaber, Tarragonaren ahizpa Sarak bere taldekide Maika Terrosorekin batera emakumezkoen senior K-2 mailan.
Gizonezko seniorren maila izan zen probarik lehiatuena, eta Ion Carballo pasaitarrak 2019an lortutako garaipena berritu zuen, 21 kilometroko borroka gogorraren ondoren, 7 ehunen pasatxoko tartearekin amaituz lehia.
Aipatzekoak, halaber, Laura Zunzunegui pasaitarrak junior mailan lortutako zilarrezko domina, Xabi Crespok eta Asier Amiamak osatutako K-2ak gizonezko seniorretan lortutako zilarra, eta Carlos Jafet-ek junior mailan eta Iker Alonsok 23 urtez azpikoen mailan lortutako brontzezko dominak.
Gainerako taldekideen lanari esker, duela bi urte lortutako bigarren postua errepikatu zuten pasaitarrek Santiagotarrak taldearen atzetik eta Zumaiako Itxas-Gain taldearen aurretik, podiuma osatuz. Orain, modalitate bereko Espainiako Txapelketa izango dute helburu pasaitarrek datorren asteburuan, Pontevedran.