Ategorrietan eraildako arrantzaleak oroitzeko hitzaldia antolatu du EH Bilduk
1931ko 'Ategorrietako sarraskia'-ren 90. urteurrena dela eta, mintzaldia eskainiko dute ostegunean 18:30ean, Trintxerpeko Alkateordetzan.
Maiatzaren Leheneko manifestazioa Donostian, 1931n. 26 egun geroago gertatu zen sarraskia Ategorrietan. Irudia: BERRIA. 
Hilaren 27an, 90 urte beteko dira Ategorrietan Guardia Zibilak 7 langile hil eta beste 30 baino gehiago zauritu zituela. Gertatutakoa oroitzeko, datorren ostegunean -hilak 13- 18:30ean Trintxerpeko Alkateordetzan, Pasaiako EH Bilduk hitzaldi bat antolatu du Ategorrietako sarraskia: herri iragan deserosoa izenburupean. Hizlaria Josetxo Otegi historialaria izango da eta garai hartan gertatutakoaren kokapen historikoa egingo du, besteak beste.
Horrez gain, bilkideek, hildako arrantzaleak oroitzeko eta euren borroka errekonozitzeko proposamena aurkeztu diete Pasaiako gainontzeko udal bozeramaileei.
Gertakariak
1931ko apirilaren 19an El Dia egunkari nazionalistan, arrantzaleek haien aldarrikapenak zehaztu zituzten: deskantsurako egunak, soldatak eta portuko langileen baldintzak hobetzea. Maiatzean zehar hainbat greba deialdi eta gatazka izan ziren eta lehen atxiloketak ere ematen hasi ziren; hortaz, San Pedro eta Trintxerpeko arrantzaleek greba orokorrerako deialdia egin eta manifestazio bat antolatu zuten Donostian maiatzaren 27rako.
10:00etan abiatu zen Trintxerpetik Donostiara 4.000 pertsona inguruko manifestazioa, ondorengo belaunaldientzako oinarrizko eskubideak eta gremio-kideen askatasuna aldarri. Aldasoro Gobernadore zibilak ez zuen manifestazioa baimendu eta hura gelditzeko asmoz armada eta segurtasun indarrak deitu zituen.
Ategorrietara iristean, Guardia Zibilak pare bat abisu eman zituen, baina manifestazioak jarraitzeko asmo osoa zuen. Erantzuna: tirokatzen hastea. Sarraskia “itzela” izan zela salatu du Pasaiako EH Bilduk, eta nahiz eta hildako nahiz zaurituen zenbaketa ez den zehatza oraindik, jasotako datuen arabera Guardia Zibilak 7 langile hil eta 30 baino gehiago zauritu zituen.
Ategorrietakoa, Donostian izan den langileen sarraski larriena izanda eta bertan eraildako langileak pasaitarrak izanik, “deigarri” iritzi dio Pasaiako alderdiak oraindik ere biktima horiei aitormen instituzionalik egin ez izanari, “nahiz eta aitortu beharra dagoen Pasaiako Udalak II. Errepublikaren garaiko memoria berreskuratzeko lan handia egin duela Sorginarri bilduman”.
Esandakoagatik, EH Bilduk urteurrena aldarri bihurtu asmo du: “Une egokia izan daiteke herri honek haiekin eta gure historian zehar bizi kalitate duinaren eta lan eskubideen alde borrokatu diren pertsona guztiekin duen zorra kitatzeko”.
Jazotakoari buruzko informazio garatuagoa eman du Pasaiako EH Bilduk honako dokumentu honetan.
