Familien arteko babes sarea aurten ere martxan
Bazkarien bueltan elkartzea eta migrante zein bertakoen familien arteko loturak sortzea zuen helburu Bizilagunak proiektuak, pandemiaren eraginez, moldatuta dator, hangoei eta hemengoei arnasa eman eta elkartasunez bidea egiteko.
SOS Arrazakeriako Gerar Carrere, JOana Ezeiza eta Samir el Jafaufi. Bizilagunak, familien arteko babes sarea iniziatiba martxan jarri du SOS Arrazakeriak aurten ere, Errenteriako Udaleko Kultura Aniztasunerako Garapenerako eta Giza Eskubideen Kooperaziorako sailarekin elkarlanean. Moldatuta heldu zen iaz programa, COVID-19aren pandemia testuingurura egokituta, eta aurten ere bide beretik egingo dute lanketa. Gerar Carrere SOS Arrazakeriako arduradunak, programaren nondik norakoak azaldu ditu elkarteko kide diren Joana Ezeiza eta Samir el Jafaufirekin batera egindako agerraldian. Gogora ekarri du Carrerek, osasun krisiak eta horri lotuta sortutako krisi sozial eta ekonomikoak “bortitz” jo dituela aurretik prekarizatuta zeuden sektoreak, “migranteena kasu. Kaltetuetako kopuru handi bat lan baldintza prekarioetan ari ziren langileak dira, baina ez horiek soilik, lan egonkorra zuten pertsonen bizitza ere hankaz gora jarri du pandemiak. Migranteen kasuan, horri guztiari, krisiaren ondorioak malgutzen lagunduko duen sare sozial eta familiarraren gabezia gehitu behar zaio”.
Horren aurrean, herritarren iniziatiba eta politika publikoak oinarrizko tresna direla zehaztu du SOS Arrazakeriako arduradunak, eta testuinguru horretan kokatu du Bizilagunak proiektua: “Hamar urte dira bertako eta migrante familiak bazkariaren bueltan elkartzen hasi zirela programaren barruan adiskidetasun lotura sortzeko haien artean, harremanetan jartzeko batzuek eta besteak, eta aberasteko. Orain, elkarri babesteko sarea izan anhi du programak. Fa,miliak, zentzu zabalean ulertzen ditugu, bizitoki berean bizi diren pertsonak”.
Funtzionamendua
Proiektuaren helburuak eta metodologia azalduko dizkiete lehenik parte hartzaileei, ondoren bikoteak egiteko familia migranteen eta bertakoen artean, “horretarako hainbat irizpide izango ditugu kontuan: familia errealitateak, errekurtsoak elkartrukatzeko aukera, gustuko dituzten jarduerak…”.
Harreman egutegia ezarriko dute gero, fisikoak ahal denean eta telematikoak beste aukerarik ez dagoenean, “familiek erabakiko dute maiztasuna nahi eta beharren arabera, autonomia sustatuz”.
SOS Arrazakeriak, bere aldetik, talde guztien jarraipena egingo du, beharrezko tresnak parte hartzaileen eskura jarriz. Aldi berean, familia bakoitzean pertsona bat izango da SOS Arrazakeriarekin harremana egiteko.
Bazkariak, azaroan
Bazkariak ziren Bizilagunak programaren oinarria, horien bueltan biltzea familia migranteak zein bertakoak. Iaz eta aurten momentuz ez dago horretarako aukerarik, antolatzaileek baina, azaroan horiek egiteko aukera ez dute baztertu, egoerak ahalbidetzen badu, bederen, “bazkari horiek, eraikitako sareen indartze ekitaldia lirateke, ospakizuna”.
Programarekin bat egin nahi duten pertsonek Errenteriako SOS Arrazakeriaren 658 74 97 56 telefono zenbakira deitu behar dute.
