Herri Arte Eskolak etzi zabalduko du matrikula epea ikasle berrientzat
Berrikuntzekin dator Arte Herri Eskola, eta datorren ikasturterako dantza zein musika instrumentu berriak txertatuta. Hitza eta ahotsak ere tarte berezia izango dute.
Garazi Lopez de Etxezarreta Herri Arte Eskolako zuzendaritzako kidea. Herri Arte Eskolak etzi zabalduko du datorren ikasturterako ikasle berrien matrikulazio epea. Lehen fase batean dagoeneko ikasle direnak izan dute aukera izena emateko, eta bihar arte izango dute ordutegiarekin aldaketa eskatzeko aukera.
Ikasle berriei dagokienean, etzitik hilaren 23ra arte izango dute izena emateko aukera. Ordutegi ezberdinak izango dituztenez, hilaren 27tik 31ra behin betikoa aukeratu beharko dute. Plaza eskaera, Herri Arte Eskolaren web orriaren bidez egin beharko dute. Bertan matrikulazio prozedura, epeak, tasak, hobariak eta beste hainbat dokumentu dituzte.
Garazi Lopez de Etxezarreta Herri Arte Eskolako zuzendaritzako kideak eman ditu gaur agerraldi bidez xehetasun horiek guztiak, eta gogora ekarri du halaber, datorren ikasturteari begira berritasunekin datorrela Arte Eskola. Musika diziplinan dultzaina eta alboka dira berritasunak, eta dantzan, garaikidea eta urbanoa txertatuko ditu eskolak eskaintza barruan.
Diziplina berria hitzaren inguruan eraiki du, gainera, eta horren barruan hainbat ikasgai izango dituzte ikasleek aukeran: Hitza jolas, Hitza tolestu, Hitza leundu, Hitza digitalizatu, irakurketa, idazketa, eremu digitala, olerkigintza, eta gidoigintza esaterako. Eskaintza adinen araberakoa izango dela aurreratu du Lopez de Etxezarretak.
Berrikuntzak ere 4 eta 7 urte arteko haurrei begira eskaintzaren barruan. Herri Arte Eskolak 4 eta 7 urte arteko haurren kasuan, hasierako ikasturteak erabat ezberdinak izango dira. Hala, 4 eta 5 urteko haurrak Musika eta Gorputz adierazpena astean bitan izango dute, 90 minutuz edo gauza bera dena, 45 minutuko bi saio astean. 6 eta 7 urteko haurrek, Musika eta Gorputz adierazpena eta Arte Plastikoak (ikusikoak) eta Ahotsa landuko dute astean 180 minutuz, hau da ordu eta erdiko bi saio egingo dituzte.
Matrikulazio epea amaituta, izena emateko aukera izango da, baina beti ere, libre gelditu diren saioetarako eta diziplinetarako.
Gida batzordea, bihar
Errenteria Musikal patronatuko gida batzordea izango dute bihar. Estatu berrien lehen zirriborroa aurkeztuko dute bertara Lopez de Etxezarretak esan duenaren arabera, “barne antolakuntza hobetzeko balioko du, eskola kontseilua izateko, orain artean izan ez duguna bertan”. Gobernantza eredua erabat aldatuko duela Herri Arte Eskolan estatutu berriak gaineratu du arduradunak, “onartzen bada eta aurrera egiten badu”. Halaber, berrikuntzak diren diziplinetarako irakasle berrien kontratazioa ere biharko gida batzordean aztertuko dute.
