Ibilgailuak kontrolatzeko semaforo sistema berria jarri dute Donibane kalean
Semaforo gorria errespetatzen ez duten ibilgailuei isuna jarriko diete hilaren 17tik aurrera. Sistema berriak Bizkaia eta Santiago plazetako sarrerak blokeatzeko aukera ere emango du.
Santiago plazarako sarbidea blokeatu ahal izango da semaforo sistema berriaren bitartez. 
Donibane kaleko semaforo sistema berritu dute udal langileek, larrialdi egoeratan zirkulazioa arindu eta segurtasuna hobetzeko xedez. Mekanismo berriak aukera ematen du argi gorria errespetatzen ez duten ibilgailuei argazkiak ateratzeko, eta isuna jarriko diete horiei hilaren 17tik aurrera.
Sistema berriarekin Bizkaia eta Santiago plazetako sarrerak blokeatzeko aukera egongo da, osasun ibilgailuen, suhiltzaileen edo poliziaren sarbidea errazteko. Halaber, pantailen bidez gidariei sartzeko aukeraren edo murrizketaren berri emango zaie.
Esandakoaz gain, udal arduradunek adierazi dute Bertakoek Aparkatzeko Udal Ordenantza berria onartzen den unean, matrikulak bideokamera bidez irakurtzeko sistema bat martxan jartzea baloratuko dutela, baimendutako ibilgailuak Donibane kalera bertakoen txartelarekin sartzen direla bermatzeko.
